Куыд ма хъусын кодтам, афтӕмӕй 28 сентябрӕй 6 октябрмӕ Мариинаг театры филиалы РЦИ-Аланийы арӕзт ӕрцӕудзӕн 3-аг ӕппӕтадӕмон Кавказаг фестивал «Мариинаг-Дзӕуджыхъӕу». 28 сентябры фестивал байгом уыдзӕн Концертон залы, ӕмӕ Гергиты Валерийы разамындӕй Симфонион оркестримӕ фортепианойӕ ацӕгъддзӕн П.И.Чайковскийы номыл 16-ӕм ӕппӕтадӕмон конкурсы Гран-при, 1-аг преми ӕмӕ Сыгъзӕрин майдан рамбулӕг Александр Канторов. Йӕ программӕйы ис Модест Мусоргскийы, Камиль Сен-Сансы, Морис Равелы ӕмӕ Гектор Берлиозы уацмыстӕ.
Музыкалон форумы 28 сентябры 17 сахатыл сӕ арӕхстдзинад равдисдзысты Цӕгат Кавказы Федералон зылды ӕвзонг музыканттӕ.
29 сентябры 18 сахатыл та уыцы залы концерт ратдзӕн Александр Канторовы клавирабенд (къамы). Ӕрыгон музыкант ацӕгъддзӕн Сергей Рахманиновы, Петр Чайковскийы, Игорь Стравинскийы уацмыстӕ. 6 октябры Концертон залы 19 сахатыл фестивал сӕхгӕндзӕн филиалы Симфонион оркестр. Йӕ дирижер — Гугкаты Зауырбег. Оркестримӕ фортепианойӕ цӕгъддзӕн П.И.Чайковскийы номыл 16-ӕм ӕппӕтадӕмон конкурсы 3-аг премийы лауреат Константин Емельянов.
29 сентябры 14 сахатыл Концертон залы фестивалы оперӕйы афишӕ концерты хуызы байгом кӕндзӕн Клод Дебюссийы «Пеллеас ӕмӕ Мелизанда». Сӕйраг партиты зардзысты: Приморскы сценӕйы солисткӕ, Программӕ Аткинсы стипендиат, П.И.Чайковскийы номыл 16-ӕм ӕппӕтадӕмон конкурсы лауреат Айгуль Хисматуллина (Мелизанда), Программӕ Аткинсы стипендиат Гамид Абдулов (Пеллеас), Мариинаг театры оперон къорды солист Андрей Серов (Голо).
29 сентябры ма 20 сахатыл Оперӕ ӕмӕ балеты театры сценӕйы концерты хуызы ӕвдисдзысты Джакомо Пуччинийы оперӕ «Богема». Сӕйраг партиты зардзысты Программӕ Аткинсы стипендиаттӕ: Екатерина Санникова (Мими), Ангелина Ахметова (Мюзетта), Александр Михайлов (Рудольф), Владислав Куприянов (Марсель), Дмитрий Григорьев (Коллен). Дыууӕ оперӕйы дӕр азӕлдзысты Гергиты Валерийы разамындӕй.
2 октябры Оперӕ ӕмӕ балеты театры сценӕйы уыдзӕн Филиалы 2018-2019 сезоны Джузеппе Вердийы оперӕ «Аида»-йы премьерӕ. Сӕвӕрдта йӕ Алексей Степанюк. Сӕйраг партиты зарынц: Мария Баянкина (Аида), Анна Матис (Амнерис), Эдем Умеров (Амонасро), Павел Шмулевич (Рамфис).
4 ӕмӕ 5 октябры Оперӕ ӕмӕ балеты театры сценӕйы Леонид Якобсоны номыл балеты театры адӕм фендзысты классикон репертуары зынгӕдӕр спектакл — Адольф Аданы «Жизель». Кӕфтытӕ сӕвӕрдтой Жан Коралли, Жюль Порро ӕмӕ Мариус Петипа.
Екатеринӕ Матренина
