Уӕрӕсейы Федерацийы Президенты цур РЦИ-Аланийы ӕххӕстбарджын минӕвар Дзанайты Барис фембӕлд, ацы аз Мӕскуыйы уӕлдӕр ахуыргӕнӕндӕттӕм чи бацыд, уыцы ирыстойнаг студенттимӕ. Дзанайы-фырт арфӕ ракодта фыццагкурсонтӕн, куыд сын загъта, афтӕмӕй сӕ къухы бафтыд бӕстӕйы зындгонддӕр институттӕм ахуырмӕ бацӕуын.
— Разӕй уӕм ӕнхъӕлмӕ кӕсынц ӕгӕрон гӕнӕнтӕ, фӕлӕ, уӕ хӕдзӕрттӕй дард кӕй стут, уымӕй, чи зоны, тыхсут. Хъуамӕ йӕ зонат, Минӕварад уын ам, Мӕскуыйы, дыккаг хӕдзары хуызӕн кӕй уыдзӕн, уый. Цӕмӕй кӕрӕдзиимӕ арӕх ӕмбӕлат, уӕ хӕлардзинад фидардӕр кӕна, уе ‘мбӕстӕгтимӕ рӕстӕг пайдаимӕ ӕрвитат, уый тыххӕй цалдӕр азы размӕ скодтам Фӕсивӕдон минӕварад. Алы институты дӕр нын ис бӕрнон адӕймаг, уӕ бон у Мӕскуыйы культурон, спортивон, интеллектуалон царды архайын ӕмӕ уӕ институттӕ, Цӕгат Ирыстон кадимӕ ӕвдисын, — загъта ӕххӕстбарджын минӕвар.
Уый ма ӕрыгон лӕппутӕ ӕмӕ чызджытӕн радзырдта, Цӕгат Ирыстонӕн хорз цӕттӕгонд специалисттӕ куыд хъӕугӕ ӕмӕ ахсджиаг сты, уый тыххӕй. «Нӕ республикӕйы разамынд ӕвӕры бӕрзонд цӕттӕдзинадимӕ специалистты командӕ сфидар кӕныны хӕс, уыдон хъуамӕ сӕ дӕсныдзинад, сӕ зонындзинӕдтӕ равдисой, фӕахъаз уой Цӕгат Ирыстоны социалон-экономикон рӕзтӕн», — бафиппайдта Дзанайты Барис.
Цӕгатирыстойнаг фӕсивӕдимӕ ма ӕрныхас кодтой иннӕ бӕрнон адӕймӕгтӕ дӕр.
УФ-йы Президенты цур РЦИ-Аланийы
ӕххӕстбарджын минӕварады пресс-службӕ
