Алы адӕймагӕн дӕр ис, йӕ сабибонты мады рӕвдыд кӕмӕй базоны, царды уӕрӕх фӕндагмӕ йӕ чи рахоны, зонындзинӕдты дунемӕ йын дуӕрттӕ чи байгом кӕны, ахӕм ахуыргӕнӕг. Ӕрвылаз, 5 октябры Уӕрӕсе фӕбӕрӕг кӕны Ахуыргӕнӕджы бон.
Знон, Цӕгат Ирыстоны Тӕбӕхсӕуты Балойы номыл Ирон академион театры уыд кадджын ӕмбырд. Ирыстоны алы горӕттӕ ӕмӕ хъӕутӕй Дзӕуджыхъӕумӕ ссыдысты ахуыргӕнджытӕ, хъомылгӕнджытӕ, тренертӕ. Рӕзгӕ фӕлтӕримӕ удуӕлдай фӕллой чи кӕны, сывӕллоны курдиат райхалыныл чи архайы, ӕгъдау, ӕфсарм, райгуырӕн бӕстӕмӕ уарзондзинадыл сӕ чи ахуыр кӕны, ахӕм ӕвзӕрст адӕм.
Бӕрӕгбон та фидауы арфӕтӕй ӕмӕ лӕвӕрттӕй. Ахуыргӕнджытӕн арфӕйы ныхӕстӕ зӕгъынмӕ ӕрбацыдысты республикӕйы Сӕргълӕууӕг Битарты Вячеслав, Хицауады Сӕрдары хӕдивӕг Иринӕ Азимова, Парламенты депутат Еленӕ Князева, районты администрациты сӕргълӕуджытӕ, профцӕдисон ӕмӕ ӕхсӕнадон организациты минӕвӕрттӕ.
— Зынаргъ ахуыргӕнджытӕ! Уӕ бӕрӕгбоны хорзӕх уӕ уӕд! Ацы бон зынаргъ у не ‘ппӕтӕн дӕр, уымӕн ӕмӕ ӕрымысӕм нӕ ахуыры азтӕ. Ахуыргӕнӕг хъомылгӕнӕг дӕр у, архайы, цӕмӕй царды фӕндӕгтыл цӕугӕйӕ пайда хӕссӕм ӕхсӕнадӕн. Цы хорз ӕгъдӕуттӕ ӕмӕ традицитӕ баззад нӕ хистӕртӕй, уыдон дарддӕр хӕццӕ кӕнынц ахуыргӕнджыты ног фӕлтӕртӕ, — загъта республикӕйы Сӕргълӕууӕг. — Уӕ куыст ӕнцон нӕу, бирӕ хӕстӕ ӕмӕ нысантӕ ӕвӕрд ис ахуырады къабазы размӕ. Бынтон зӕрдӕмӕдзӕугӕ не сты нӕ уавӕртӕ, бирӕ скъолатӕ сты цалцӕггӕнинаг, сӕ ифтонггарз базӕронд, сагъӕссаг у ахуыргӕнӕджы мызд. Ӕппӕт уыцы аххосӕгтӕ хъыгдарынц ӕнувыд куыст кӕнын. Республикӕйы разамынд ӕппӕт фӕрӕзтӕй дӕр архайдзӕн, цӕмӕй ацы аипдзинӕдтӕ аиуварс кӕнӕм, нӕхи ӕмӕ федералон бюджеты ӕххуысӕй, араздзыстӕм ӕмӕ цалцӕг кӕндзыстӕм, ӕнӕмӕнгӕй кусдзыстӕм мызд фӕфылдӕр кӕныныл. Фидӕн азы бюджеты уыцы фӕрӕзтӕ ӕвӕрд ӕрцӕудзысты. Ацы хабарыл ахуыргӕнджытӕ сӕмбӕлдысты тыхджын къухӕмдзӕгъдимӕ.
Профессионалон ӕнтыстдзинӕдты, бирӕ азты ӕнӕзӕрдӕхудт фӕллойы тыххӕй, рӕзгӕ фӕлтӕры хъомыладмӕ аккаг ӕвӕрӕн кӕй бахаста, уый тыххӕй майдан «Ирыстоны намысӕн» республикӕйы Сӕргълӕууӕджы къухӕй райста Цыбырты Тамарӕ, Дзӕуджыхъӕуы 67-ӕм рӕвдауӕндоны сӕргълӕууӕг.
«РЦИ-Аланийы сгуыхт ахуыргӕнӕджы кадджын ном» лӕвӕрд ӕрцыд Битарты Ларисӕйӕн, Хъараты Женяйӕн, Мӕргъиты Сергейӕн, Иринӕ Седых ӕмӕ Татраты Фатимӕйӕн.
Къорд адӕймагӕн, бирӕ азты куысты ӕнтыстдзинӕдты тыххӕй саккаг кодтой кадджын ном «РЦИ-Аланийы ахуырады кадджын кусӕг».
Нӕ республикӕйы Парламенты депутатты номӕй ахуыргӕнджытӕн арфӕ ракодта профилон комитеты сӕрдар Еленӕ Князева ӕмӕ къорд адӕймагӕн радта Парламенты Кады нысантӕ.
Уыцы бон бирӕ арфӕйы ныхӕстӕ райхъуыст сценӕйӕ. Уыдоны ‘хсӕн, «Афӕдзы хуыздӕр ахуыргӕнӕг»-ыл кӕй банымадтой, уыдонӕн дӕр.
Зӕрдӕбын арфӕтӕ сӕ ахсджиаг фӕллойы тыххӕй бӕрӕгбоны архайджытӕн ракодтой Иринӕ Азимова ӕмӕ нӕ республикӕйы Муниципалон зылдты советы сӕрдар, Кировы районы сӕргълӕууӕг Нӕкуысаты Барис, ӕндӕр бӕрнон кусджытӕ.
РЦИ-Аланийы ахуырад ӕмӕ наукӕйы министр Людмилӕ Башарина алы районы ахуырады къабазы тыххӕй дӕр загъта хицӕнӕй. Нӕ республикӕйы уарзон артисттӕ та бӕрӕгбон сфидауын кодтой сӕ зард ӕмӕ кафтӕй.
Гугкаты Жаннӕ
Къамтӕ систа Къӕбысты Харитон
