Дзӕуджыхъӕуы электротехникон завод «Заря Осетии»-йы (раздӕры «Бином») кӕй уадзы, уыцы продукци уӕйгӕнӕн хайад байгом нӕ республикӕйы сӕйраг горӕты.
— Нӕ куыстуаты уагъд электротехникон продукци йӕхи бавдыста ӕппӕт домӕнты аккаг хӕрзхъӕд товарӕй. Нӕ цырӕгътӕй пайда кӕнынц Дигорайы, ӕрыдоны, Беслӕн ӕмӕ Дзӕуджыхъӕуы объектты мидӕгӕй ӕмӕ ӕддейы. Архайдтам паддзахадон программӕ «Кӕртыты аивкӕнынад»-ы. Нӕ зӕрды ис, Дзӕуджыхъӕуы стадион «Спартак» ӕмӕ рынчындӕттӕм, стӕй Дзӕуджыхъӕуӕй Мӕздӕджы онг ног фӕндагмӕ рухс бауадзын ӕмӕ ӕндӕр куыстыты архайын. Диодон рухскӕныны системӕтӕ ӕвзарӕг адӕмӕн ӕххуыс кӕндзыстӕм. Не специалисттӕ электрон тыхы фӕлхасады бӕрц бӕлвырд кӕнынц лӕвар. Нӕ цырӕгътӕй пайда кӕныны ӕмгъуыд у 5 азы, —зӕгъы Цӕгат Кавказы федералон зылды базарады рӕзты хайады хицау Кристинӕ Романова.
Ныртӕккӕ завод мӕймӕ рауадзы мин алыхуызон цырагъы. Ацы продукци уадзынц 20 адӕймаджы. Рӕхджы завод ног кусджыты исын райдайдзӕн ӕмӕ республикӕйы рӕзтӕн ахъаз кӕндзӕн.
