Незамантӕй фӕстӕмӕ мыды диссаджы миниуджытӕ зындгонд сты адӕмӕн. Наукӕйы тыхджын сырӕзты рӕстӕг ахуыргӕндты лабораторон куыстыты фӕрцы раиртӕстой, мыд канд адджын хӕринаг кӕй нӕу, уый. Хойраджы ацы продукт ахъаззаджы хос у адӕймаджы ӕнӕниздзинад фидар кӕнынӕн.
Куыд зонӕм, афтӕмӕй мыдӕн ис алыхуызон сортытӕ. Се ‘ппӕтмӕ иухуызон тыхджын миниуджытӕ нӕй, куыд хӕрынӕн, афтӕ алыхуызон низты ныхмӕ дӕр. Мыды буаргъӕдтӕй цӕмӕй раст пайдагонд цӕуа адӕймаджы ӕнӕниздзинад фидар кӕнынӕн, уый тыххӕй мыддартӕ хъуамӕ архайой сыгъдӕг мыд райсыныл.
Хъыгагӕн, иуӕй-иу зыдыка мыддартӕ бындзыты биологи ӕмӕ куыстхъомдзинад хорз нӕ фӕзонынц, афтӕмӕй ныхилынц уыдоны мидцардмӕ. Базары фылдӕр ӕхца ралухон, зӕгъгӕ, арӕх мыдыбындзыты бафтауынц алыхуызон сироптӕй «мыд» цӕттӕ кӕныныл.
Кӕй зӕгъын ӕй хъӕуы, ахӕм «мыд» мыд нӕ хуыйны. Нӕй дзы витаминтӕ, алыхуызон антибиотикон хӕйттӕ, ферменттӕ, микроэлементтӕ, ӕндӕр ахсджиаг буаргъӕдтӕ. Рынчын адӕймаг ахӕм мыдӕй фӕхъӕстӕ, уӕд йӕ низ тарфдӕр цы фӕвӕййы, ӕндӕр дзӕбӕх нӕ кӕны.
Цымӕ фӕстаг рӕстӕг мыдӕй хынджылӕггаг нӕ сарӕзтам? Кӕддӕр авд низы чи сӕфта, уый йӕхӕдӕг низ цӕмӕн фестад? Ацы фарстытӕ рагӕйдӕр мӕн ӕнцой нӕ уадзынц. Раздӕхӕн та ис мыды ӕлутон миниуджытӕм. Ӕмӕ куыд, уӕ хорзӕхӕй? Нӕдӕр базары, нӕдӕр дуканиты иунӕг уӕйгӕнӕг дӕр дын нӕ зӕгъдзӕн, цавӕр мыд у, кӕцӕй хастой мыдыбындзытӕ адджинаг кӕнӕ цавӕр зайӕгойтӕй, мыд кӕм ӕмӕ цы мигӕнӕнты ӕмӕ температурӕйы ӕвӕрд ис, уыдӕттӕ.
Ӕдзухдӕр промышленнон куыстуӕтты уагъд мыды банкӕты этикеткӕтыл фыст вӕййы «натуральный мед», зӕгъгӕ. Ӕмӕ ахӕм мыд залгъӕды дидинджыты нектарӕй дӕр мыдыбындзытӕ кӕнынц. Уымӕй та адӕймаг нӕ, фӕлӕ бӕх дӕр мӕлы.
Мӕн зӕгъын фӕнды, цӕмӕй нӕм мыдӕн дӕр уа паддзахадон стандарт. Хъуамӕ ахсджиаг продуктӕн бӕрӕггонд цӕуой йӕ хосгӕнӕн миниуджытӕ стандартты домӕнтӕм гӕсгӕ. Ӕнӕбӕрӕггонд мыдӕн базары уӕйгӕнӕн куы нӕ уаид, уӕд дзы ӕхсӕнад бирӕ рамбулид.
Сиукъаты Харитон, пенсиисӕг
