2014 азӕй фӕстӕмӕ ӕрдзӕн цыртдзӕвӕнтӕ инвентаризацигонд цӕуынц Цӕгат Ирыстоны. Йӕ нысан у сӕ алфамбылай зӕххыты нырыккон уавӕрӕн аргъ скӕнын ӕмӕ сӕ арӕнтӕ фӕбӕлвырддӕр кӕнын дӕр.
Хъыгагӕн, ацы куыст вазыгджын кӕй у, бирӕ архайд ыл кӕй ис, уыдӕтты азарӕй ныр ацал-ауал азы кӕронмӕ нӕма ахӕццӕ. Уымӕ гӕсгӕ мӕ абон радзурын фӕнды, нӕ алчидӕр хорз кӕй зоны, уыцы ӕрдзон объекттӕй иуы тыххӕй, ӕмӕ уый та у Дзӕуджыхъӕуы зӕронд бульвар Сабырдзинады проспекты. Фӕлӕ бирӕтӕ нӕ зондзысты, РЦИ-Аланийы Хицауады 2008 азы 22 февралы рахаст уынаффӕмӕ гӕсгӕ бульвар республикон нысаниуӕджы цыртдзӕвӕныл нымад кӕй ӕрцыд, уый. Йӕ фӕзуат ӕртӕ хайыл дих кӕнынц Дзанайты Иваны, Куйбышевы ӕмӕ Горькийы цӕхгӕрмӕ уынгтӕ.
Алыхуызон бӕлӕсты бульварӕн йӕ дӕргъ у 1057 метры, ахсы 1,553 гектары, ис цӕугӕдон Терчы рахизфарс горӕты историон хайы, ӕмӕ у культурон бынты объект. Проспектӕн XIX ӕнусы фыццаг ӕмбисы бындур ӕрӕвӕрдта Дзӕуджыхъӕуы фидары комендант, инӕлар-лейтенант Петр Нестеров.
Уавӕр афтӕ у, ӕмӕ бульвары сӕйраг аллейы кӕрӕй-кӕронмӕ йӕ рӕстӕджы зӕрдӕхуызсыф сусхъӕд сагъд ӕрцыд фылдӕр. Ныр бӕлӕстӕ хӕццӕ кӕнынц 20 метры онг ӕмӕ уымӕй уӕлдӕр бӕрзӕндмӕ, сӕ зӕнгты диаметр та у 40-60 сантиметры бӕрц. Сусхъӕд бӕлӕстӕй уӕлдай ам зайы кӕрз, урс акъаци ӕмӕ ныгуылӕйнаг платаны иугай экземпляртӕ. Кӕрдӕгджын ярусы та тыд вӕййы бирӕазыккон мӕгъӕлда, сӕрдыгон дидинджыты культуртӕ ӕмӕ чесайы (самшиты) ӕнусонцъӕх ӕлвыд къутӕртӕ.
Уӕдӕ бӕлӕстӕ, кӕрдӕг, ӕндӕр зайӕгойтӕ кӕм уа, уырдӕм мӕргътӕн дӕр ӕнӕтӕхгӕ нӕй. Ам цӕрынц сырддонцъиутӕ, халӕттӕ, цъиӕхтӕ, сауцъиутӕ ӕмӕ ӕндӕр мӕргътӕ. Ӕппӕт хабӕрттӕ дӕр ацы ӕрдзы цыртдзӕвӕны тыххӕй 2014 азы октябры бацӕттӕ кодта специалистты стыр къорд, разамынд та сын лӕвӕрдтой биологон наукӕты кандидаттӕ К. Шкарлет, И. Каторгин ӕмӕ Д. Шильников.
Дзыныхты Аленӕ,
РЦИ-Аланийы ӕрдзон фӕрӕзтӕ ӕмӕ экологийы министрады пресс-службӕ
