Пенсион кармӕ чи схӕццӕ, стӕй пенси чи исы, уыдон арӕхӕй-арӕхдӕр пайда кӕнынц нырыккон мадзӕлттӕ ӕмӕ гӕнӕнтӕй.
Ууыл дзурӕг у ахӕм цау — пенси снысан кӕныны ӕмӕ, адӕймагмӕ йӕ пенси цы хуызы хӕццӕ кӕна, уый равзарыны тыххӕй Пенсион фондмӕ цы куырдиӕттӕ ӕрбацыд, уыдонӕн сӕ 80 проценты адӕм ӕрбарвыстой электронон фӕрӕзты, бӕлвырддӕр зӕгъгӕйӕ та, Уӕрӕсейы Федерацийы Пенсион фонды сайт «Гражданины хи сӕрмагонд кабинет»-ы ӕххуысӕй.
Нырыккон электронон фӕрӕзтӕй пайда кӕнын у тынг удӕнцой хъуыддаг, уымӕн ӕмӕ адӕймаджы йӕхи цӕуын нӕ хъӕуы. Уымӕ гӕсгӕ, нырыккон фӕрӕзтӕй чи пайда кӕны, уыцы адӕмы нымӕц кӕны фылдӕрӕй-фылдӕр.
Пенсион фонды «Гражданины хи сӕрмагонд кабинет» фадат дӕтты, пенсийӕн цыдӕриддӕр хуызтӕ ис, уыдон снысан кӕнынӕн. Уый тыххӕй адӕймаг хъуамӕ бацамона ӕрмӕстдӕр йӕ бӕрӕггӕнӕнтӕ, равзара пенсийы хуыз, ӕмӕ йӕм ӕй куыд ӕгъдауӕй хӕццӕ кӕной, уый.
Алы адӕймагӕн дӕр, йӕ пенси нымайгӕйӕ, каст цӕуы, куыстдӕттӕг йӕ кусӕджы тыххӕй пенсион фондмӕ цавӕр бӕрӕггӕнӕнтӕ балӕвӕрдта, уыдонмӕ, ома, адӕймаг кӕм куыста, алы ран дӕр цас рӕстӕг бакуыста, фӕдзӕхстадон фиддонтӕ цас бафыста. Ӕппӕт уыцы бӕрӕггӕнӕнтӕн фенӕн ис, «Арӕзт чи ӕрцыд, уыцы пенсион барты тыххӕй», зӕгъгӕ, «Гражданины хи сӕрмагонд кабинет»-ы цы хайад ис, уым. Бӕрӕггӕнӕнтӕй кӕцыдӕртӕ раст куы нӕ уой, уӕд адӕймаджы хъӕуы йӕ куыстдӕттӕгмӕ бацӕуын ӕмӕ йӕ бӕрӕггӕнӕнтӕ сбӕлвырд кӕнын.
Цӕмӕй адӕймагӕн йӕ бон Уӕрӕсейы Пенсион фонды лӕггӕдтӕй электронон хуызы пайда кӕнын уа, уый тыххӕй йӕхи хъуамӕ регистраци скӕна лӕггӕдты порталы. Уый йӕхи бон куы нӕ бауа, уӕд ын баххуыс кӕндзысты, йӕ цӕрӕн бынатмӕ гӕсгӕ цы Пенсион фонды хайадмӕ хауы, уый кусджытӕ. Йемӕ йӕ райсын хъӕуы ӕрмӕстдӕр йӕ паспорт ӕмӕ чырӕг телефон.
Цӕмӕй паддзахадон лӕггӕдтӕ хӕрзхъӕддӕр кӕной, уый тыххӕй электронон фӕрӕзтӕй пайда кӕныны гӕнӕнтӕ Уӕрӕсейы Пенсион фонд иудадзыг кӕны фылдӕр ӕмӕ парахатдӕр. Уый фӕрцы адӕймагӕн йӕ бон исын у канд пенси нӕ, фӕлӕ ма ныййарӕджы капитал, социалон лӕггӕдтӕ ӕмӕ ӕндӕр бафыстытӕ дӕр.
Электронон хуызы Уӕрӕсейы Пенсион фонд цы сервистӕ ӕмӕ лӕггӕдтӕ ӕххӕст кӕны, уыдон сты фонды сайты: https://es.pfrf.ru
КЪНАТТАТЫ Маринӕ
