Дзӕуджыхъӕуы скъолаты райдыдта ахуырдзауты ӕппӕтуӕрӕсеон олимпиадӕйы муниципалон хай.
Йӕ интеллектуалон гӕнӕнтӕ равдисынмӕ цӕттӕ чи у, ахӕм мингай скъоладзауты иугӕнӕг дзыллон мадзал ӕрвылаз дӕр цӕуы Дзӕуджыхъӕуы. Йӕ архайджытӕ ерыс фӕкӕнынц 19 дӕсныйадӕй.
Жюримӕ хаст ӕрцыдысты фӕлтӕрдджын педагогтӕ ӕмӕ ахуырады управленийы минӕвӕрттӕ. Уыдон куыстытӕ фӕиртасынц, горӕты методикон иугӕндтӕ та бӕрӕггӕнӕнтӕ бахынцынц.
Олимпиадӕйы уӕлахиздзаутӕн бӕстӕйы хуыздӕр уӕлдӕр ахуыргӕнӕндӕттӕм ахуыр кӕнынмӕ бацӕуыны фадат кӕй вӕййы, уымӕ гӕсгӕ ӕрвылаз скъоладзаутӕ ацы мадзалмӕ сӕхи бацӕттӕ кӕнынц уӕлдай биноныгдӕр. Ӕппынкъаддӕр дыууӕ дӕсныйадӕй олимпиадӕйы чи фӕархайы ӕмӕ дзы хорз бӕрӕггӕнӕнтӕ чи равдисы, ахӕм сывӕллӕтты нымӕц афӕдзӕй-афӕдзмӕ рӕзы.
Ерысты архайджытӕм ӕппӕтӕй кадджындӕр вӕййынц математикӕйы, уырыссаг ӕвзаджы, физикӕйы, биологи ӕмӕ ӕхсӕнадзонынады дӕсныйӕдтӕ.
Муниципалон хай кӕронмӕ ахӕццӕ уыдзӕн 29 ноябры (уыцы бон арӕзт ӕрцӕудзысты олимпиадӕйы фӕстаг предметӕй — фӕсарӕйнаг ӕвзӕгтӕй —фӕлварӕнтӕ). Фӕстӕдӕр базондзыстӕм олимпиадӕйы горӕтаг хайы уӕлахиздзауты нӕмттӕ.
Нӕ уацхӕссӕг
