Уӕрӕсейы иннӕ регионты куыд у, афтӕ Цӕгат Ирыстоны дӕр иннӕ аз кусын райдайдзӕн программӕ «Земский учитель».
Хъӕутӕм, поселоктӕм ӕмӕ, 50 мин адӕймагӕй къаддӕр кӕм цӕры, ахӕм горӕттӕм кусынмӕ чи ацӕуа, уыцы ахуыргӕнджытӕн уыдзӕн милуан сомы райсыны бар.
— Программӕ ӕххӕстгонд куы ӕрцӕуа, уӕд хъӕуты ӕмӕ чысыл горӕтты скъолаты фӕфылдӕр уыдзӕн ахуыргӕнджыты нымӕц. Программӕйы архайыны тыххӕй конкурсон уагӕй адӕмы ӕвзарыны сӕйраг ӕууӕлтӕ фидаргонд ӕрцыдысты федералон ӕмвӕзадыл. Кӕд уыцы ӕууӕлтӕ ӕххӕстгонд не ‘рцӕуой, уӕд ахуыргӕнӕджы хӕс уыдзӕн, цы ӕхца йын бафидой, уый фӕстӕмӕ раттын. Уӕрӕсейы Рухсады министрад регионтӕм барвыста методикон уынаффӕтӕ.
Ныртӕккӕ нӕ ведомствӕ цӕттӕ кӕны конкурс аразыны,стӕй компенсацион фиддон дӕттыны ӕмӕ йӕ хардз кӕныны фӕткы нормативон-барадон бындур. Конкурсы мадзӕлттӕ ӕххӕстгонд цӕудзысты ӕргомӕй. Федералон портал «Земский учитель» кусын райдайдзӕн иннӕ аз январы. 16 цӕгатирыстойнаг ахуыргӕнӕгӕн уыдзӕн компенсацион фиддон райсыны бар, — зӕгъы Цӕгат Ирыстоны Ахуырад ӕмӕ наукӕйы министрады уынаффӕгӕнӕг Гаджиты Аланӕ.
