Дзӕуджыхъӕуы Сабырдзинады проспекты трамвайты фӕндӕгтӕ аразын райдыдтой. Горькийы уынгӕй Мордовцевы уынджы онг хай сног кӕндзысты.
Фӕндагаразджытӕ тротуарты къӕйтӕ исын райдыдтой, стӕй релсытӕ райхалынӕн экскаватор сӕвӕрдтой. Трамвайты цӕлхытӕ бирӕ азты дӕргъы кӕуыл тылдысты, уыцы релсытӕ раууатмӕ ӕрцыдысты.
— Ацы ран трамвайты фӕндӕгтӕ рагӕй уыдысты нывылгӕнинаг. Раздӕр баивдзыстӕм фӕндаджы рахиз фарс, фӕстӕдӕр та бавналдзыстӕм галиу фарсмӕ, — зӕгъы Дзӕуджыхъӕуы муниципалон кусӕндон «Фӕндӕгты фонд»-ы специалист Тогойты Алан.
Ацы аз фӕндӕгты рацарӕзт кӕронмӕ ахӕццӕ кӕндзысты.
Цалцӕггӕнӕн куыстыты рӕстӕг трамвайтӕ Сабырдзинады проспекты нӕ цӕудзысты, 2-аг ӕмӕ 10-ӕм маршрутты трамвайтӕ рӕстӕгмӕ цӕудзысты Къостайы проспектӕй ОЗАТЭ-йы онг ӕмӕ фӕстӕмӕ.
Горӕты администраци хатыр куры адӕмӕй ӕмӕ сӕ фӕдзӕхсы, цӕмӕй, цы уавӕр сӕвзӕрд, уый бамбарой.
Дзӕуджыхъӕуы администрацийы пресс-службӕ
