Республикӕ Цӕгат Ирыстон-Аланийы Муниципалон скондты совет фӕстаг азты йӕ куыст зынгӕ фӕхуыздӕр кодта. Советы правленийы сӕрдар, Кировы районы муниципалон сконды сӕргълӕууӕг Нӕкуысаты Барисы хъуыдымӕ гӕсгӕ, уыцы хъуыддаджы стыр ӕххуыс кӕны республикӕйы Муниципалон скондты советы РЦИ-Аланийы Сӕргълӕууӕджы ӕххӕстбарджын минӕвар Геннадий Родионов. Уый ӕмӕ советы правленийы уӕнгты хъӕппӕрисӕй ӕрӕджы Елхоты арӕзт ӕрцыд советы правленийы уӕрӕхгонд ӕмбырд.
Советы правленийы уӕнгтӕ ӕркастысты муниципалон скондты 16 ахсджиаг фарстӕй фылдӕрмӕ ӕмӕ рахастой хъӕугӕ уынаффӕтӕ. Ӕмбырд байгом кодта ӕмӕ йӕ амыдта Нӕкуысаты Барис. Фарстыты фӕдыл раныхас кодтой республикӕйы мидхъуыддӕгты министры хӕдивӕг ӕхсӕнадон ӕгъдау хъахъхъӕныны, пъӕлицӕйы булкъон Альберт Сабанаев, Рахизфарсы районы муниципалон сконды сӕргълӕууӕг Фрайты Сослан, РЦИ-Аланийы ахуырад ӕмӕ наукӕйы министры хӕдивӕг Алыккаты Алан, РЦИ-Аланийы Контролон-нымайӕн палатӕйы сӕрдар Хъӕлыцты Инал, республикӕйы ӕнӕнхъӕлӕджы уавӕрты министрады хайады хицау Мажид Абдулмуслимов, РЦИ-Аланийы хъӕууон хӕдзарад ӕмӕ хойраджы министры хӕдивӕг Мӕрзойты Хъазыбег, РЦИ-Аланийы прокуроры хистӕр ӕххуысгӕнӕг Еленӕ Нехаева, РЦИ-Аланийы муниципалон скондты советы ӕххӕстгӕнӕг директор Дзестелты Барис.
Республикӕйы Муниципалон скондты советы 2020 азы куысты пълан, ӕрвылазон конкурс «РЦИ-Аланийы бынӕттон хиуынаффӕйады хуыздӕр специалист» ӕмӕ РЦИ-Аланийы муниципалон скондты советы Кады грамотӕ сфидар кӕныны тыххӕй бӕстон докладтӕ скодта Нӕкуысаты Барис. Совет рахаста хъӕугӕ уынаффӕтӕ уыцы ахсджиаг фарстыты фӕдыл дӕр.
Республикӕйы районты муниципалон скондты ӕхсӕн ерыстӕ ацы аз Совет нывыл кӕй сӕвӕрдта, уый фадат радта бӕрӕггӕнӕнтӕ сбӕлвырд кӕнынӕн дӕр. Советы правленийы ӕмбырды кӕронбӕттӕнмӕ РЦИ-Аланийы Сӕргълӕууӕг Битарты Вячеслав Мӕздӕджы районӕй ӕрбацыд Елхотмӕ, Советы правленийы уӕнгты зӕрдиаг архайдӕн раарфӕ кодта ӕмӕ ерысы уӕлахиздзаутӕн радта ӕхцайы фӕрӕзты сертификаттӕ.
Ӕртыккаг бынат 3 милуан сомимӕ райста Горӕтгӕрон район — йӕ сӕргълӕууӕг Гаглойты Алан, фондз милуаны сертификат 2-аг бынатимӕ лӕвӕрд ӕрцыд ӕрыдоны районы муниципалон сконды сӕргълӕууӕг Тотраты Владиславӕн, Кировы районы муниципалон сконд равдыста ӕппӕты хуыздӕр бӕрӕггӕнӕнтӕ, фыццаг бынат ӕмӕ 10 милуан сомы сертификат республикӕйы Сӕргълӕууӕг радта Нӕкуысаты Барисӕн.
Ӕппӕтуӕрӕсеон конкурсы федералон къӕпхӕн «Хуыздӕр муниципалон фӕлтӕрддзинад», Нациты ӕхсӕн сабырдзинад ӕмӕ кӕрӕдзи ӕмбарынады, стӕй национ политикӕйы ӕндӕр мадзӕлтты муниципалон ӕмвӕзады хорз ӕнтыстдзинӕдтӕ равдисыны тыххӕй
Национ хъуыддӕгты федералон агентады разамонӕг Игорь Бариновы къухфыстимӕ, Арфӕйы писмойӕ хорзӕхджынгонд ӕрцыд РЦИ-Аланийы ӕрыдоны районы Красногоры хъӕуы администраци — йӕ сӕргълӕууӕг Баситы Владислав. Афтӕ, ӕхсызгон ӕнтыстытӕ ӕмӕ лӕвӕрттимӕ Ног азы къӕсӕрыл ӕрлӕууыд РЦИ-Аланийы Муниципалон скондты совет.
Касаты Батрадз
