«Хæстон уавæрты архайгæйæ, æрвылбон кæд тынг бирæ зындзинæдтæ бавзарын, уæддæр фæбæллын мæ бинонтимæ ногæй фембæлынмæ, кæрæдзиуыл зæрдиагæй куыд бацин кæнæм, афтæ».
Ацы ныхæстæ загъта сæрмагонд æфсæддон операцийы црайуаг архайæг Гæззаты Давид. Сæрмагонд операцийы архайыны агъоммæ куыста барадхъахъхъæнæг оргæнты, куыстæй уæгъд рæстæг та-иу бацыд таксийы службæмæ, æмæ-иу ын уæлæмхасæн капекк бакусыны фадат уыд. 2014 таксийы радон заказ æххæст кæныны рæстæг лæппулæг базонгæ Венерæимæ. Фæстæдæр дыууæ æрыгон адæймаджы сæ цард баиу кæныны фæнд скодтой æмæ ныр дыууадæс азы дæргъы кæрæдзи æмбаргæйæ, æмудæй цæрынц. Рантыст сын дыууæ æвæджиауы сывæллоны: иуæндæсаздзыд Данæ æмæ æртæаздзыд Мæирбег (лæппуйыл ном сæвæрдтой йæ фыдыфыды кадæн).
Ныр цалдæр азы дæргъы Давид ис сæрмагонд æфсæддон операцийы тæлмы. Кæй зæгъын æй хъæуы, бинойнæгтæ кæрæдзийæ рæстæгмæ кæй фæцух сты, уымæн быхсыныл архайынц, фæнды сæ кæрæдзиимæ фембæлын, сæ цард ногæй иумæ куыд цæуа, афтæ. Цардæмбал æмæ цотæй уæлдай, æфсæддон службæгæнæгмæ хæдзары æнхъæлмæ кæсынц йæ мад Гульнази, стæй хотæ Зæлинæ æмæ Томæ. Давид, отпусчы уæвгæйæ, цыбыр рæстæгмæ йæ црайуаг хæдзармæ æрбацæуы, бинойнæгтæ кæрæдзиуыл æхсызгонæй сæмбæлынц, бацин кæнынц, алкæйдæр фæнды, цæмæй сæрмагонд æфсæддон операцийæн рæвдздæр кæрон æвæрд æрцæуа, уый.
Райдайæны хæсты уæвын Давидæн, кæй зæгъын æй хъæуы, æнцон нæ уыд, фæлæ нæлгоймаг къæпхæнгай уыцы уавæртыл сахуыр. Не ’фсæддонты цы нырыккон техникæ æмæ хæцæнгæрзтæй ифтонг кæнынц, не ’мзæххон уыдонæй арæхстджынæй пайда кæны. Давид кæимæ службæ кæны, уыцы адæм кæрæдзиуыл æнувыд сты, бахъуаджы заман кæрæдзийæн баххуыс кæнынц.
Адæймагæн æппæтæй зынаргъдæр æмæ хæстæгдæр бинонтæ сты. Уарзондзинад, кæрæдзиуыл æнувыд уæвыны фæрцы адæймаг цыфæнды зындзинæдтæн кæй бафæраздзæн, уымæн æвдисæн – Гæззаты бинонтæ. Царды кæд цыфæнды уавæртæ сæвзæры, уæддæр ацы бинонтæ æппæтæй уæлдæр æвæрынц æнувыддзинад æмæ фидыд.
Гæззаты Зæринæ
