«Вахтангов. Путь домой» – æртыккæгæм ацы фестиваль та ногæй Дзæуджыхъæуы йæ фыццаг къахдзæф акодта.
Фестиваль райдыдта, амæй размæ куыд уыд, афтæ: нæ горæты сæйраг уынг – Сабырдзинады проспектыл – рæсугъдæй, хъæлдзæг æмæ бæрæгбонхуызæй ацыдысты йæ архайджытæ – алы адæмыхæттыты национ уæлæдарæсы бынæттон æмæ, уазæгуаты нæм чи ‘рцыд, уыцы артисттæ, кафджыты æмæ музыкалон коллективтæ, уынгты сæ реквизиттæ равæргæйæ, адæмæн сæ спектакльтæ чи равдисы, ахæм театрты артисттæ, нæ республикæйы цæрджытæ æмæ уазджытæ. Уарын дæр нæ баурæдта адæмæн сæ цин æмæ хъæлдзæгдзинад. Бирæтыл уыд хъæбæр гæххæттæй арæзт костюмтæ. Кæй фæндыд, уыдонæн сæ алкæмæн дæр сæрмагондæй цæттæ кодтой, Сабырдзинады фæзыл чи æрбынæттон, уыцы æрмадзы дæснытæ.
Проспектыл цæуджытæн сæ разæй «цыд» принцессæ Турандот – Карло Гоццийы зындгонд аргъауы персонаж. Спектакль «Принцесса Турандот» 1922 азы Мæскуыйы аивадон театры (МХТ-йы) æртыккаг студийы сценæйы сæвæрдта Евгений Вахтангов. Уый уыд йæ царды фæстаг æнтыст… Уæдæй фæстæмæ спектакль ссис, театрæн ном чи скодта, ахæм.
Дзæуджыхъæуы Сабырдзинады проспектыл диссаджы парады фæстæ Сабырдзинады фæзыл мæскуыйаг театр «Злые рыбы» равдыстой, арты стъæлфæнтæ æмæ музыкæйæ йе ‘дзаг чи уыд, ахæм спектакль.
Дарддæр, фестивалы программæмæ гæсгæ, абон, 8 июлы, Вахтанговы хæдзары арт-кафейы арæзт æрцæудзæн ахуырадон программæ. Сихоры 12 сахатæй изæры авд сахатмæ уазджытæн сæ бон байхъусын уыдзæн Вадим Верникы лекцимæ «Лица эпохи. Майя Плисецкая» æмæ Валентина Федоровайы лекцимæ «Рубен Симонов».
Изæры авд сахатыл та Мариинаг театры хайады сценæйы М.Шкетаны номыл Республикæ Марий-Элы Драмæйы национ театр равдисдзæн Михаил Булгаковы радзырдтæм гæсгæ æвæрд спектакль «Записки юного врача».
ДЕДЕГКАТЫ Зæлинæ
