Туалгом

0
413

Кавказы ӕнусон хӕхты астӕу бӕрӕг дары Урс хох. Цыма йӕ айнӕг сӕрыл урс нымӕтхуд ӕркодта, уыйау фӕзыны бӕмбӕгхуыз ӕврӕгътӕй. Ам, Урс хохы алыварс, ӕрдзы фидауц сты Туалгомы кӕрдӕгджын уӕлвӕзтӕ, хӕрдгӕбыд къӕдзтӕ-мӕдзтӕ цӕугӕдӕттӕ, бӕрзонд ӕхсӕрдзӕнтӕ. Зӕрӕмӕджы, Нары, Тибы, Зруджы, Захъа ӕмӕ ӕндӕр рӕтты хӕхты тугдадзинтӕй хъарынц алӕмӕты суардӕттӕ. Уӕдӕ ма бӕлвырддӕр ӕрныхас кӕнӕм ацы хъӕуты ӕмӕ цӕрджыты тыххӕй.

Зӕрӕмӕг

Зӕрӕмӕгӕй рахизӕрдӕм над фӕндаг цӕуы Мамысоны хъӕутӕм, уырдыгӕй Бубы ӕфцӕгыл — Гуырдзыстонмӕ. Фӕлӕ ацы фӕндагӕй, раздӕрау, арӕх ничиуал пайда кӕны. Ныртӕккӕ бӕлццӕттӕ ӕппӕтӕй дӕр цӕуынц Уӕлладжыры комы автомобилон фӕндагыл. Нар, Зруг ӕмӕ Захъайыл — уый Ручъы ӕфцӕджы бынты тъунелыл бахизы Хуссар Ирыстонмӕ.

Зӕрӕмӕджы цӕрӕг мыггӕгтӕ уыдысты Магкатӕ, Теккатӕ, Дзоцъитӕ, Сихъотӕ, Куыдзӕгтӕ, Хъайтмазтӕ, Лӕппынӕгтӕ, Абойтӕ ӕмӕ Мамыттӕ. Хъӕуӕн галиуӕрдӕм ӕрыдоны доны фаллаг фарс ис Цми. Ам цардысты Бигъуылатӕ, Туатӕ, Хетӕгкатӕ, Гуыбатӕ, Кӕсӕбитӕ.

Куыд дзурынц, афтӕмӕй Хетӕгкатӕ ӕмӕ Гуыбатӕ рафтыдысты Нарырдыгӕй, Туатӕ — Сатъатӕй. Туаты ма хонынц Уӕлладжыры комӕй ӕрбафтгӕ, Кӕсӕбитӕ та сты Цъамады хъӕуӕй.

Цмийӕ фалдӕр ис Тоборзайы хъӕу. Цардысты дзы ӕрыдонӕй ӕрбалидзӕг Хуырымтӕ. Дзырдтой афтӕ ӕмӕ, дам, ам раджы уыдис Бигъуылаты уӕтӕруат дӕр. Сатъаты цардысты Туатӕ, Цӕргӕстӕ, Боцитӕ; Тибслийы — Гаджитӕ; Цъебаты — Беритӕ; Хуыкъалайы цӕрджытӕ та уыдысты Коцитӕ, Мурастӕ, Гаджитӕ; Годжыцатӕ, Дзанайтӕ, Ногъайтӕ та цардысты Уарцъейы, Гуры ӕмӕ ӕндӕр рӕтты.

Республикӕ Цӕгат Ирыстон-Аланийы паддзахадон архивы ӕрмӕджытӕ куыд дзурынц, афтӕмӕй незаманты ардӕм ӕрбабырстой цавӕрдӕр шахы ӕфсӕдтӕ. Ӕвӕццӕгӕн, Шах Аббас фыццӕгӕмы 1613-1616 азты кӕнӕ та шах Ага Мохамеды ӕфсӕдтӕ 1795 азы. Шахы ӕфсӕдтӕн Зӕрӕмӕджы цӕрджытӕ ныхкъуырд радтой ӕмӕ аздӕхтысты фӕстӕмӕ.

Нар

Ацы хъӕу афтӕ уымӕн хуыйны ӕмӕ, дам, дзы нӕртон адӕм цардысты. Ныртӕккӕ дӕр дзы ис Нарты ныхас, ӕндӕр историон цыртдзӕвӕнтӕ. Куыд зонут, афтӕмӕй Нар у Хетӕгкаты Къостайы райгуырӕн хъӕу. Хетӕг, дам, уыдис Иналы фырт. Чырыстон дин райста ӕмӕ йӕм уый тыххӕй мады зӕнӕг ӕфсымӕртӕ Биаслан ӕмӕ Аслӕнбег фӕфыдӕх сты.

Хетӕгӕн дӕр ӕндӕр гӕнӕн нал уыд ӕмӕ ралыгъд. Уӕлладжыры комыл ӕрбацыд Цмийы хъӕумӕ. Ам Бигъуыла суазӕг кодта Хетӕджы. Уазӕг иу заман цуаны ацыд, ныртӕккӕ Нары хъӕу кӕм ис, уырдӕм. Амардта сагтӕ, йӕхицӕн халагъуд сарӕзта сӕ цӕрмттӕй ӕмӕ, цӕргӕйӕ, баззадис Нары.

Фӕстӕдӕр Бигъуыла Хетӕгӕн йӕ чызджы радта бинойнагӕн. Хетӕгӕн рацыдис цот. Хетӕгкаты Къоста этнографион очерк «Особа»-йы фыссы: Хетӕгӕй райгуырд Георги, Георгийӕ — Мами, Мамийӕ — Гоцъи, Гоцъийӕ — Сидӕ, Сидӕйӕ — Амыран, Амыранӕй — Аса, Асайӕ — Елизбар, Елизбарӕй — Леуан, Леуанӕй — Къоста. Иу ныхасӕй, Хетӕгӕй — Къостамӕ рацыд дӕс фӕлтӕры.

Зӕгъӕн ис, Хетӕг Нары куы фӕзынд, уӕдӕй нырмӕ цӕуы 400 азӕй фылдӕр. Хетӕгӕй равзӕрдысты ахӕм мыггӕгтӕ: Джиотӕ, Мамиатӕ, Дзидахантӕ, Басатӕ, Гуыбатӕ, Дзапартӕ, Дзанайтӕ, Бырнацтӕ.

Куыд загътам, афтӕмӕй Нары цардысты Хетӕгкатӕ, Исахътӕ, Дзапартӕ; Регахы — Мамиатӕ; Комахы — Еналдытӕ, Гуыбатӕ; Поты фӕзы — Цуцитӕ, Хаситӕ (ӕрбалыгъдысты Мызурӕй); Саубыны — Джиотӕ, Мамиатӕ; Сахсаты — Хуыбецтӕ, Саутӕтӕ, Дзанайтӕ; Сласы — Гаджитӕ; Олсубийы — Еналдытӕ; Гуыркъуымты — Бырнацтӕ; Бериты хъӕуы — Беритӕ; Бирӕгъты хъӕуы — Бирӕгътӕ, Дзасихы — Еналдытӕ, Тотитӕ, Хаситӕ; Дзинаты — Гуыбатӕ; Елгонайы — Дзанайтӕ, Отаратӕ, Еналдытӕ; Цъесы — Епхитӕ; Цъасемы — Дзапартӕ, Исахътӕ; Цъемсайы — Хетӕгкатӕ, Балатӕ; Сындзысӕры — Дзанайтӕ; Сырнады — Дзанайтӕ; Скӕсӕны — Дзапартӕ, Дзидахантӕ.

Зруг

Зруджы цардысты Хозитӕ (ӕрбалыгъдысты Дӕйыхъӕуӕй), Бирӕгътӕ — Цъамадӕй, Хаситӕ — Мызурӕй, Таугазтӕ — Нӕзыджынӕй (Уӕлладжыры ком), стӕй уӕд Козатӕ ӕмӕ Гусалтӕ.

Мамысон

Мамысонмӕ хаудысты Тиб, Хъӕдысӕр, Калак, Тли, Хълиат, Лисри ӕмӕ Елты хъӕутӕ. Паддзахадон архивы фыстытӕм гӕсгӕ Тиб у лӕджы ном (ӕвӕццӕгӕн, ӕрбацыд Уӕлладжыры комӕй цуаны ӕмӕ ам баззади цӕргӕйӕ).

Тибы цардысты Кучитӕ (ӕрбалыгъдысты Мызурӕй), Боцитӕ, Икъотӕ, Багатӕ, Къадзатӕ, Тедетӕ. Къадзатӕ ӕрбалыгъдысты Луарӕй, Тедетӕ — Ходӕй; Хъӕдысӕры цардысты Айлартӕ, Калачы — Гайтӕ, Кучитӕ, Тедетӕ; Тли ӕмӕ Хълиатмӕ Суантӕ ӕрбалыгъдысты Уыналӕй. Уымӕй уӕлдай ма дзы цардысты Къадзатӕ, Токтӕ, Мамыттӕ ӕмӕ Боцитӕ; Лисрийы — Гаматӕ, Дарчитӕ, Добатӕ ӕмӕ Моураутӕ.

Тохсырты Къоста

ОСТАВЬТЕ ОТВЕТ

Please enter your comment!
Please enter your name here