2019 азы бӕрӕггӕнӕн куыд ӕвдисынц, афтӕмӕй дунеон аэропорт «Дзӕуджыхъӕу»-ы лӕггӕдтӕй спайда кодтой 565 581 бӕлццоны (2018 азы бӕрӕггӕнӕнтимӕ абаргӕйӕ, уый у 26 проценты фылдӕр).
Афтӕмӕй, йӕ историйы фыццаг хатт, нӕ горӕты аэропорты лӕггӕдтӕй чи пайда кодта, уыдоны нымӕц азмӕ 500 минӕй фӕфылдӕр.
Уыимӕ, специалисттӕ куыд зӕгъынц, афтӕмӕй аэропорты архайды ахадындзинадӕн ӕвдисӕн у, мидбӕстон рейсытӕй уӕлдай, фӕсарӕнтӕм уӕлдӕфон балцыты нымӕц дӕр кӕй рӕзы, уый.
Зӕгъӕм, ивгъуыд азы ӕппӕт бӕлццӕттӕй 545 135 адӕймаджы спайда кодтой мидбӕстон маршруттӕй. Дунеон уӕлдӕфон балцыты та уыдысты 20 446 адӕймаджы (уымӕй размӕ азимӕ абаргӕйӕ, 14 проценты фылдӕр).
Дзӕуджыхъӕуы аэропортыл цы уӕзӕгтӕ ӕрвыст цӕуы, уыдоны бӕрц дӕр рӕзы. 2019 азы аэропорты кусджытӕ райстой ӕмӕ арвыстой алыхуызон уӕзӕгтӕ ӕмӕ посты 636 тоннӕйы (2018 азимӕ абаргӕйӕ, 6 проценты фылдӕр).
Аэропорты куысты ахӕм ӕвӕрццӕг ивддзинӕдтӕ кӕй цӕуы, уымӕн ахъаз у, фылдӕр авиакомпанитӕ се ‘ргом Цӕгат Ирыстонмӕ кӕй раздӕхтой, уый. Ахӕм пайдайаг ӕмархайды фӕрцы уӕрӕхдӕр кӕны уӕлдӕфон балцыты географи, стӕй рӕзы рейсыты нымӕц дӕр. Зӕгъӕм, Бетъырбухмӕ хӕдтӕхджытӕ ныр арӕхдӕр тӕхынц.
Фӕстаг аз Цӕгат Ирыстон архайы уӕлдӕфон балцытӕн субсидитӕ дих кӕныны федералон программӕйы. Уыцы ӕууӕл дӕр фадат дӕтты ног рейсытӕ гом кӕнынӕн. Зӕгъӕм, ивгъуыд аз кусын райдыдтой дыууӕ ног маршруты «Ростов-Дзӕуджыхъӕу-Ростов» ӕмӕ «Сочи-Дзӕуджыхъӕу-Сочи». Уыцы ногдзинӕдтӕн адӕм хорз аргъ скодтой, зӕрдиагӕй пайда кӕнынц дыууӕ рейсӕй дӕр. Уыимӕ, Сочимӕ уӕлдӕфон балцытӕ ӕххӕстгонд цӕуынц зымӕджы дӕр, Ростовмӕ та хӕдтӕхӕг ногӕй тӕхын райдайдзӕн уалдзӕджы.
Зӕгъын хъӕуы, фӕстаг рӕстӕг аэропорты техникон ифтонгдзинад зынгӕ кӕй фӕхъомысджындӕр, уый тыххӕй дӕр. Сӕрмагондӕй сӕ цӕст бӕстон дарынц авиацион ӕдасдзинадӕн ахъазгӕнӕг мадзӕлттӕм, ӕнаиппӕй ӕххӕст кӕнынц ӕппӕт технологон ӕмӕ барадон домӕнтӕ дӕр. Ӕппӕт уыцы ӕууӕлтӕ, кӕй зӕгъын ӕй хъӕуы, хорзӕрдӕм ахадынц аэропорты куыстыл ӕмӕ уӕлдӕфон бӕлццӕтты удӕнцойыл.
Аэропорт «Дзӕуджыхъӕу»-ы генералон директор Сергей Чалов куыд зӕгъы, афтӕмӕй 2020 азы адарддӕр уыдзӕн уӕлдӕфон вагзалы архайд фӕхъомысджындӕр кӕныныл куыст. Йӕ ныхасмӕ гӕсгӕ, цалцӕггонд цӕудзысты аэропорты бӕстыхӕйттӕ, уыимӕ, бавналдзысты мидбӕстон балцыты ног терминалы арӕзтадмӕ дӕр.
Данил Шепелев
