Цӕгат Ирыстоны Национ наукон библиотекӕйы электронон фӕрӕзты зал кӕй байгом, уый фӕрцы ацы кусӕндонмӕ ӕрбацӕуӕг адӕмӕн ныр ис дунейы ӕппӕтӕй егъаудӕр онлайн-библиотекӕты ӕмӕ чингуыты каталогты ӕфснайд ӕрмӕджытимӕ базонгӕ уӕвыны фадат.
Библиотекӕйы ӕрмӕджыты фылдӕр хай нымӕцон ифтонггӕрзтӕм раивтой кусӕндоны кусджытӕ сӕхӕдӕг. Ныхас, фыццаджыдӕр, цӕуы бӕстӕзонӕн фонды стӕм экземпляртыл. Адӕймагӕн ис наукон ӕмӕ документалон литературӕ, стӕй газетты ӕмӕ журналты ӕрмӕджытӕ библиотекӕйы сайты ссарыны фадат. Уымӕй уӕлдай электронон фӕрӕзты залы кусы лӕвар ӕнӕтел Интернет, ис дзы чысыл компьютеримӕ куыстӕн бынӕттӕ дӕр. Цыфӕнды адӕймагӕн дӕр ацы залмӕ ӕрбацӕуыны бар ис 9 сахатӕй 19 сахаты онг.
— Ныртӕккӕ нӕм ис, библиотекӕ иугонд кӕимӕ у, ахӕм бӕрӕггӕнӕнты 30 базӕйӕ фылдӕр. Уымӕ гӕсгӕ нӕ бахъуыд удӕнцой электронон фӕрӕзты зал байгом кӕнын. Нӕ библиотекӕмӕ ӕрбацӕуынц канд ӕрыгӕттӕ нӕ, фӕлӕ ацӕргӕ адӕймӕгтӕ дӕр. Иуӕй-иуты бафӕнды компьютерӕй пайда кӕныныл сахуыр уӕвын, иннӕты та — паддзахадон лӕггӕдты къабазы кусын. Ахуыр кӕнынӕн ӕмӕ кусынӕн ам ис хорз уавӕртӕ, — зӕгъы библиотекӕйы электронон фӕрӕзты залы разамонӕг Тъуриты Татьянӕ.
