Президент Владимир Путин ӕмӕ премьер-министр Михаил Мишустины фембӕлды рӕстӕг сбӕрӕг УФ-йы ног Хицауады сконд. Ног Хицауады уӕнгты номхыгъд Президент йӕ Указӕй сфидар кодта 2020 азы 21 январы.
Хицауады Сӕрдары хӕдивджытӕ ӕмӕ министрты сфидар кӕнынӕй уӕлдай, Президент иуӕй-иу ивддзинӕдтӕ бахаста Хицауады структурӕмӕ. Афтӕ, нырӕй фӕстӕмӕ премьер-министрӕн уыдзӕн 9 хӕдивӕджы (ныронг уыдысты 10). Уымӕй уӕлдай, ӕхгӕд ӕрцыд Цӕгат Кавказы хъуыддӕгты фӕдыл министрад (йӕ ӕххӕстбартӕ йын ратдзысты Экономикон рӕзты министрадмӕ).
Ног структурӕмӕ гӕсгӕ, Хицауады Сӕрдары фыццаг хӕдивӕгӕй нысангонд ӕрцыд Андрей Белоусов (ныронг уыд Президенты уынаффӕгӕнӕг). Премьер-министры иннӕ хӕдивджытӕй нысангонд ӕрцыдысты: Дмитрий Григоренко, Юрий Трутнев, Виктория Абрамченко, Юрий Борисов, Татьянӕ Голикова, Алексей Оверчук, Марат Хуснуллин ӕмӕ Дмитрий Чернышенко.
Ног Хицауады сӕ куыст адарддӕр кӕндзысты: мидхъуыддӕгты министр Владимир Колокольцев, хъахъхъӕнынады министр Сергей Шойгу, фӕсарӕйнаг хъуыддӕгты министр Сергей Лавров, финансты министр Антон Силуанов, энергетикӕйы министр Александр Новак, промышленност ӕмӕ базарады министр Денис Мантуров, хъӕууон хӕдзарады министр Дмитрий Патрушев, ӕнӕнхъӕлӕджы уавӕрты министр Евгений Зиничев, транспорты министр Евгений Дитрих, арӕзтад ӕмӕ цӕрӕнуӕтты-коммуналон хӕдзарады министр Владимир Якушев ӕмӕ ӕрдзон фӕрӕзтӕ ӕмӕ экологийы министр Дмитрий Кобылкин.
Иннӕ бынӕттӕм нысангонд ӕрцыдысты ног адӕймӕгтӕ: юстицийы министрӕй — Константин Чуйченко, спорты министрӕй — Олег Матыцин, культурӕйы министрӕй —Ольгӕ Любимова, экономикон рӕзты министрӕй — Максим Решетников, наукӕ ӕмӕ уӕлдӕр ахуырады министрӕй — Валерий Фальков, ӕнӕниздзинад хъахъхъӕнынады министрӕй — Михаил Мурашко, рухсады министрӕй — Сергей Кравцов, Дард Хурыскӕсӕны рӕзты фарстыты министрӕй — Александр Козлов, нымӕцон райрӕзты, бастдзинад ӕмӕ дзыллон коммуникациты министрӕй — Максут Шадаев ӕмӕ фӕллой ӕмӕ социалон хъахъхъӕнынады министрӕй — Антон Котяков.
