Ацы бонты Дзӕуджыхъӕуы дарддӕр цӕуы ӕвзонг иртасджыты республикон конкурс «Наукӕмӕ къӕпхӕн»-ы кӕронбӕттӕн.
Ацы уӕрӕх мадзал арӕзт ӕрцыд Цӕгат Ирыстоны Ахуырад ӕмӕ наукӕйы министрад ӕмӕ Сывӕллӕтты сфӕлдыстады республикон галуаны разамынды хъӕппӕрисӕй.
Республикӕйы ахуырад ӕмӕ наукӕйы министры хӕдивӕг Алыккаты Алан куыд фӕнысан кодта, афтӕмӕй министрад иудадзыгдӕр хъуамӕ мадзӕлттӕ араза рӕзгӕ фӕлтӕры наукон ӕмӕ сфӕлдыстадон хъомыс раргом кӕнынӕн, ахуырдзау фӕсивӕды наукон-техникон архайдмӕ ӕмхиц кӕнынӕн.
«Ацы республикон конкурс дӕр уыцы мадзӕлттӕй иу у. Ӕхсызгон у, конкурсы архайджытӕ азӕй-азмӕ фылдӕр кӕй кӕнынц, уый. Рӕстӕг куыд ӕвдисы, афтӕмӕй «Наукӕмӕ къӕпхӕн»-ы лауреаттӕ ӕмӕ уӕлахиздзауты зынгӕ хай фӕстӕдӕр свӕййынц нӕ бӕстӕйы раззагдӕр институттӕ ӕмӕ университетты студенттӕ. Мӕ зӕрдӕ се ‘ппӕтӕн дӕр зӕгъы ӕнтыстджын архайд», — загъта Алыккаты Алан.
Ацы аз республикон конкурсмӕ сӕ наукон-иртасӕн куыстытӕ балӕвӕрдтой 250 адӕймагӕй фылдӕр. Уыцы скъоладзаутӕ ерыс кӕнынц ӕртӕ номинацийы сӕ кармӕ гӕсгӕ: 1-4 кълӕстӕ, 5-7 кълӕстӕ ӕмӕ 8-11 кълӕстӕ. Ерысы архайджыты куыстытӕ дихгонд ӕрцыдысты 22 секцийыл (сӕ темӕтӕ баст сты гуманитарон, ӕрдззонӕн, математикон ӕмӕ техникон наукӕтимӕ).
Конкурсы бӕрӕггӕнӕнтӕ хыгъд ӕрцӕудзысты 31 январы. Наукон-иртасӕн ерысы уӕлахиздзаутӕ ӕмӕ лауреаттӕ хорзӕхджын ӕрцӕудзысты дипломтӕ ӕмӕ зӕрдылдарӕн лӕвӕрттӕй.
Гӕлӕуты Наталья
