Дзӕуджыхъӕуы арӕзт ӕрцыди ӕппӕтуӕрӕсеон акци «Хъӕбатырты уынг». Архайдтой дзы Советон Цӕдисы Хъӕбатыр Остъаты Алексейы номыл 25-ӕм скъолайы ахуырдзаутӕ.
Сывӕллӕттӕ адӕмӕн уынджы байуӕрстой, Остъайы-фырты сгуыхтдзинӕдтӕ фыст кӕм уыдысты, ахӕм сыфтӕ сӕдӕйӕ фылдӕр.
Ирӕттӕй лӕгдзинад равдисыны тыххӕй Советон Цӕдисы Хъӕбатыры кадджын ном ӕппӕтӕй раздӕр радтой 58-ӕм бомбӕппарӕг авиацион полчъы хистӕр тӕхӕг Остъаты Егоры фырт Алексейӕн. ӕвзыгъд тӕхӕг архайдта Белорусси ӕмӕ Мӕскуымӕ ‘ввахс карз хӕстыты. Хӕстон хӕслӕвӕрдӕй ӕрбацӕйздӕхгӕйӕ, Остъаты Алексей фӕмард 1942 азы 7 январы.
Фыдыбӕстӕйы Стыр хӕсты Уӕлахизы 75 азы кадӕн арӕзт акцитӕ ма ноджыдӕр арӕзт цӕудзысты хӕстон намысы горӕт Дзӕуджыхъӕуы.