Дзӕуджыхъӕуы ахуырады центр «Интеллект»-ы 1,5-6-аздзыд сывӕллӕттӕн ӕхсӕз уӕлӕмхасӕн къорды кӕй байгом, уый фӕрцы ис рӕвдауӕндоны бынӕттӕй 150 сывӕллоны сифтонг кӕныны фадат.
Амӕй размӕ ахӕм къордтӕ сарӕзтой, скъолайы кабинетты хуызы кӕмӕй пайда кодтой, уыцы агъуыстытӕ рацаразыны фӕрцы. Сцалцӕг сӕ кодтой, сӕ сантехникӕ сын ногӕй баивтой, ног сынтӕджытӕ ӕмӕ хуыссӕнгӕрзтӕ балхӕдтой. Сывӕллӕттӕн хӕринаг цӕттӕ кӕнынц санитарон нормӕтӕм гӕсгӕ.
Къордтӕ байгом кодтой кадджын уавӕры. Рӕвдауӕндон «Интеллект»-мӕ кӕй цот цӕудзысты, уыцы ныййарджытӕн бацӕттӕ кодтой концерт, стӕй сын сарӕзтой зонынгӕнӕг экскурси.
— Нӕхи нымайӕм «Интеллект»-ы бинонтыл. Абон райдыдта нӕ царды ног хай — кусӕм 1,5-аздзыд сабитимӕ. Ацы хъуыддагмӕ хъомылгӕнджытӕм дӕр ис профессион ахуырад, каст фесты медицинон курсытӕ. Сывӕллӕттӕ хъомылгӕнӕджы куы бауарзой, уӕд рӕвдауӕндон дӕр бауарздзысты, — загъта «Интеллект»-ы разамонӕг Гӕлӕуты Белӕ.
— Абон «Интеллект»-ы зӕрдӕхӕлар коллектив йӕ дуӕрттӕ уазӕгуарзонӕй байгом кодта нӕ республикӕйы ӕппӕтӕй чысылдӕр цӕрджытӕн. Сабитӕн ацы рӕвдауӕндоны удӕнцой уавӕртӕ кӕй уыдзӕн, уый мӕ уырны. Фӕнды мӕ, цӕмӕй декретон отпусчы фӕстӕ куыстмӕ рацӕуӕг ӕрыгон ныййарджытӕ паддзахады ӕххуыс хатой ӕмӕ сӕ цотыл ма мӕт кӕной, — зӕгъы Цӕгат Ирыстоны ахуырад ӕмӕ наукӕйы министры хӕдивӕг Дзанкисты Ирмӕ.
Уӕ зӕрдыл уын лӕууын кӕнӕм, нӕ республикӕйы
Сӕргълӕууӕг Битарты Вячеслав йӕ ӕрвыстӕджы бафӕдзӕхста, рӕвдауӕндӕттӕм рады чи лӕууы, уыдоны нымӕц фӕкъаддӕр кӕныны куыст дарддӕр ӕххӕст кӕнын.
Нӕ уацхӕссӕг
