Мӕскуыйы УФ-йы Президенты Администрацийы цы уӕрӕх ӕмбырд уыд, уым фехъусын кодтой, ӕппӕтуӕрӕсеон конкурс «Уӕрӕсейы раздзӕуджытӕ»-йы ног къӕпхӕны райдайӕны тыххӕй. Ныр та ӕрыгон ӕхсӕнадон архайджытӕ сӕ арӕхстдзинад ӕвдисдзысты политикӕйы номинацийы.
Ӕмбырды архайдтой ӕмӕ журналистты фарстытӕн дзуаппытӕ лӕвӕрдтой УФ-йы Президенты Администрацийы Разамонӕджы фыццаг хӕдивӕг Сергей Кириенко, УФ-йы Паддзахадон Думӕйы Сӕрдары хӕдивӕг Александр Жуков, Федерацийы Советы уӕнг Анатолий Артамонов, «Независимая газета»-йы сӕйраг редактор Константин Ремчуков, ӕндӕр политиктӕ ӕмӕ зындгонд адӕймӕгтӕ.
Сергей Кириенко куыд радзырдта, афтӕмӕй конкурс «Уӕрӕсейы раздзӕуджытӕ» азӕй-азмӕ хъомысджындӕр кӕны, фӕстаг рӕстӕг дзы архайынц зынгӕ фылдӕр, йӕ хъарутӕ административон разамынд ӕмӕ иннӕ къабӕзты бавзарынмӕ чи хъавы, уыцы ӕрыгон адӕм. Конкурсы уӕлахиздзаутӕй бирӕтӕ ныридӕгӕн кусын райдыдтой бӕрнон бынӕтты, куыд федералон ведомствӕты, афтӕ хицауады регионалон оргӕнты дӕр. Ӕмӕ сӕ архайды фыццаг къахдзӕфтӕ сты ӕнтыстджын.
Уыцы ӕууӕлтӕ хынцгӕйӕ, уынаффӕ хаст ӕрцыд, цӕмӕй конкурсы номинацитӕ фӕуӕрӕхдӕр уой, цӕмӕй фылдӕр ӕрыгон специалисттӕн уа сӕ арӕхстдзинад равдисыны фадат.
Политикӕйы номинацийы ерысты архайынвӕнд чи скӕна, уыдоны цавӕр документтӕ бацӕттӕ кӕнын хъӕуы, стӕй цавӕр хӕслӕвӕрдтыл кусдзысты, уый тыххӕй бӕстон радзырдтой конкурсы экспертон советы сӕрдар Павел Безручко ӕмӕ ӕнӕкоммерцион организаци «Россия — страна возможностей»-ы генералон директор Алексей Комиссаров.
«Ацы номинацийы ерысты архайджытӕн аргъгонд цӕудзӕн иуцасдӕр ӕндӕр барӕнтӕм гӕсгӕ. Кӕд ӕмӕ разамонджыты конкурсы стырдӕр ӕргом здӕхт цыд, кандидат цас арӕхстджын у разамонӕджы куыстмӕ, раздзӕуӕджы миниуджытӕй цас хайджын у, уымӕ, уӕд, ног номинацийы ерысты рӕстӕг та сӕйрагдӕр ӕргом здӕхт цӕудзӕн конкурсанты социалон бӕрнондзинадмӕ, ӕхсӕнады царды фарстытӕм йӕ цӕстӕнгасмӕ, стӕй ӕхсӕнадон цардарӕзты бирӕ фарстытӕ лыг кӕнынмӕ ӕмӕ афтӕ дарддӕр», — радзырдта Алексей Комиссаров.
Йӕ ныхасмӕ гӕсгӕ, конкурсы архайыны фӕдыл документтӕ бадӕттӕн ис 2020 азы 16 мартъийы онг. Мартъийы-апрелы конкурсы архайджытӕ ӕххӕст кӕндзысты ерысы дистанцион хӕслӕвӕрдтӕ. Апрелы уыдзысты конкурсы ӕрдӕгкӕронбӕттӕнтӕ, майы та — кӕронбӕттӕн.
Конкурсы тыххӕй бӕстон информаци базонӕн ис йӕ сӕрмагонд сайты — политическиелидеры.рф.
Нӕ уацхӕссӕг
