Ивгъуыд азы ӕппӕтуӕрӕсеон физкультурон-спортивон комплекс «ГТО»-йы нормативтӕ Цӕгат Ирыстоны сӕххӕст кодтой мин адӕймагӕй фылдӕр.
Уый тыххӕй знон РЦИ-Аланийы Физикон культурӕ ӕмӕ спорты министрады коллегийы йӕ доклады фехъусын кодта министр Хуыгаты Алан.
«Азӕй-азмӕ фылдӕр кӕны, «ГТО»-йы комплексы нормативты домӕнтӕ чи сӕххӕст кӕны, уыцы адӕмы нымӕц. Зындгонд куыд у, афтӕмӕй уыцы физкультурон-спортивон комплексы нормативтӕ ӕнтыстджынӕй сӕххӕст кодтой республикӕйы Сӕргълӕууӕг, министрадтӕ ӕмӕ ведомствӕты разамонджытӕ. Уыцы ӕууӕл дӕр, кӕй зӕгъын ӕй хъӕуы, ахъаз у, цӕмӕй фылдӕр адӕм се ‘ргом раздахой ӕнӕниз цардыуагмӕ. Ӕмткӕй райсгӕйӕ, 2019 азы «ГТО»-йы нормативтӕ сӕххӕст кӕныны ерысты архайдтой 1000 адӕймагӕй фылдӕр. Уыдонӕй 408 райстой «ГТО»-йы «сыгъзӕрин» риуылдаргӕ нысантӕ», —радзырдта Хуыгайы-фырт.
Физикон культурӕ ӕмӕ спорты министрады коллегийы хыгъд ӕрцыдысты ивгъуыд азы архайды бӕрӕггӕнӕнтӕ, стӕй фӕнысан кодтой хӕстӕгдӕр рӕстӕджы куысты пълантӕ.
Нӕ уацхӕссӕг
