Ленк кӕнынӕй Волгограды цыдысты Цӕгат Кавказы ӕмӕ Уӕрӕсейы Хуссар федералон зылдты иумӕйаг чемпионаты ерыстӕ фӕсивӕд ӕмӕ ас спортсменты ‘хсӕн. Ӕдӕппӕт 515 спортсмены ерыс кодтой фыццаг бынӕттӕ бацахсыныл ӕмӕ Уӕрӕсейы чемпионатмӕ балцӕгтӕ райсыныл. Ирыстойнаг ленкгӕнджытӕн бантыст 16 хӕрзиуӕджы рамбулын.
Хицӕн спортсменты ерысты хорз бӕрӕггӕнӕнтӕ равдыста Игорь Бутякины хъомылгӕнинаг Дмитрий Бибиков. Уый фыццаг бынӕттӕ рамбылдта 100 метрмӕ баттерфляй ӕмӕ уӕгъдибар хуызӕй ленк кӕнгӕйӕ ӕрыгӕтты ерысты. Ас спортсментимӕ, ерыс кӕнгӕйӕ та баттерфляйӕ 100 метрмӕ, ленк кӕнгӕйӕ бацахста ӕртыккаг бынат, 50 метрмӕ та уыди дыккаг бынаты. Уӕгъдибар хуызы, ленк кӕнгӕйӕ ма Дмитрий 200 метрмӕ ас спортсменты ерысты бацахста ӕртыккаг бынат, фӕсивӕды ‘хсӕн та уыди дыккаг.
Игорь Бутякины иннӕ хъомылгӕнинаг Тӕкъоты Максим та фыццаг бынат бацахста йӕ фӕсонтыл, 50 метры 27,52 секундмӕ аленк кӕнгӕйӕ.
Хицӕн спортсменты ерысты ма бронзӕ майданӕй хорзӕхджын сси Георгий Глущенко. Уый уӕгъдибар хуызы 400 метры аленк кодта 4,40,97 минутмӕ.
Нӕ лӕппутӕ сӕхи сӕрӕнӕй равдыстой эстафетон ерысты.
Дмитрий Бибиков, Георгий Глущенко, Тӕкъоты Максим ӕмӕ Давид Бутхузи уӕгъдибар хуызы 4х100 метрмӕ ерысты сӕ разӕй никӕй ауагътой ӕмӕ рамбылдтой сыгъзӕрин майдантӕ.
Эстафетӕ 4х100 метрмӕ ӕмхӕццӕ хуызтӕй, ленк кӕнгӕйӕ дӕр нӕ лӕппутӕ сӕхи равдыстой арӕхст-джынӕй. Тӕкъоты Максим, Дзугкойты Валери, Дмитрий Бибиков ӕмӕ Георгий Глущенко бацахстой дыккаг бынат ӕмӕ райстой ӕвзист майдантӕ.
Афтӕмӕй нӕ лӕппутӕ рамбылдтой 7 сыгъзӕрины, 6 ӕвзисты ӕмӕ 3 бронзӕ майданы. Ерыстӕм сӕ бацӕттӕ кодтой тренертӕ: Игорь Бутякин, Игорь Григорашвили ӕмӕ Найфонты Виктор. Цы бӕрӕггӕнӕнтӕ равдыстой, уый тыххӕй нӕ командӕйы хистӕр тренер Игорь Бутякин зӕгъы:
«Нӕ лӕппутӕ сӕхи сӕрӕнӕй равдыстой. Кӕд сӕхи цӕттӕ кӕнынмӕ цыдӕр хъуӕгтӕ ӕййӕфтой, уӕддӕр тырныдтой хорз бӕрӕггӕнӕнтӕ равдисынмӕ. Волгограды ерысты фӕстӕ Уӕрӕсейы чемпионат цӕудзӕн 3-6 апрелы ӕмӕ уырдӕм балцӕгтӕ райстой: Дмитрий Бибиков, Тӕкъоты Максим, Георгий Глущенко, Давид Бутхузи ӕмӕ Дзугкойты Валери. Ныр нӕ дысвӕлдӕхтӕй бавналын хъӕуы уыцы ерыстӕм нӕхи бацӕттӕ кӕнынмӕ. Уӕрӕсейы чемпионаты цӕмӕй хӕрзиуӕгджын суай, уый тыххӕй хъӕудзӕн ноджы хуыздӕр бӕрӕггӕнӕнтӕ равдисын. Уымӕ тырндзыстӕм иумӕ».
Баскаты Уырызмӕг
