Цæгат Ирыстоны Хицауады Сæрдар ТУСКЪАТЫ Таймураз радон хатт бабæрæг кодта, национ проекты фæлгæты республикæйы цы ахуырадон кусæндæттæ арæзт цæуынц, уыдон.
Сæ иу ис Рахизфарсы районы Цæлыччы. Ацы ран дыууæ къуырийы размæ кусджытæ райдыдтой скъола аразын. Ног ахуыргæнæндоны уыдзæн 200 бынаты скъоладзаутæн. Ныртæккæ Цæлыччы цы скъола кусы, уым ахуырдзаутæн ис æрмæстдæр 156 бынаты, уымæй уæлдай, уый дзуапп нал дæтты нырыккон домæнтæн.
Хицауады Сæрдар арæзтад цы бон бабæрæг кодта, уыцы бон арæзтадон бригад кодта цæттæгæнæн куыстытæ. Прораб Гæриаты Михал куыд радзырдта, афтæмæй уæзæгтæисæн кран сцæттæ уыдзæн æмæ кусын райдайдзæн ацы мæйы кæрон.
Аразджыты профессоналон цæттæдзинады тыххæй Тускъаты Таймураз куы бафарста, уæд прораб дзуапп радта, куыстытæ кæй æххæст кæндзысты, сæ дæсныйад тынг бæрзонд кæмæн у, æрмæстдæр ахæм сисамайджытæ.
— Скъола уыдзæн дыууæуæладзыгон. Арæзтад цы бæстыхай бацахсдзæн, уымæн йæ иумæйаг фæзуат уыдзæн 3 723 квадратон метры. Проектмæ гæсгæ скъолайы уыдзæн æмбырдтæаразæн зал æмæ спортивон зал, стæй, 60 бынаты кæм уыдзæн, ахæм хæрæндон, — загъта Гæриайы-фырт.
60-æм азты райдайæны арæзт чи æрцыд, уыцы зæронд скъола хæлд æрцæудзæн. Йæ бынаты та сараздзысты футболон фæз.
Ног скъолайæн уыдзæн йæхи инфраструктурæ — сæрмагондæй хицæн хъармгæнæн, уымæй уæлдай, зынгсирвæзтытæй бахъахъхъæныны домæнтæм гæсгæ, скъолайы фæзы уыдзæн, доны 300 кубометры кæм цæудзæн, ахæм бæрцуат.
— Арæзтадæн йæ фыццаг бонтæй фæстæмæ лæмбынæг каст цæуы йе ‘ппæт документтæм, æппæт процесстæм дæр, уымæн æмæ нæ сæйрагдæр хæс у, 2020 азы кæронмæ нæм цæмæй фæзына нырыккондæр ахуырадон кусæндæттæ. Сывæллæттæ хъуамæ ахуыр кæной зæрдæмæдзæугæ уавæрты. Афтæ цæмæй уа, ууыл æмгуыст кæнынц республикæйы Хицауад, бынæттон хиуынаффæйады оргæнтæ æмæ куыстытæ æххæстгæнæг организацитæ, æмæ се ‘мгуыстдзинадæй аразгæ у нæ иумæйаг æнтыст, — арæзтад бабæрæг кæныны фæстæ бафиппайдта Тускъаты Таймураз.
Уымæй уæлдай, Хицауады Сæрдар æркаст, Ногиры 1-æм астæуккаг скъолайы реконструкцигæнæн куыстытæ куыд цæуынц, уымæ. Хъæуы астæу чи æрбынæттон, уыцы скъола арæзт æрцыд 1929 азы.
Йæ бындурон цалцæггæнæн куыстыты пъланмæ гæсгæ, аразджытæ баивдзысты скъолайæн йæ цар, фæзындзæн дзы ног дуæрттæ æмæ рудзгуытæ, мидæгæй дæр скъола йæ хуыз бынтондæр аивдзæн, ивд æрцæудзысты хъарм æмæ электрон тых уадзæн системæтæ. Цалцæггæнæн куыстыты фæстæ скъолайы фæзындзæн 440 бынаты ахуырдзаутæн.
— Ацы скъолайæн ис хъæздыг истори, æмæ нæ хæс у йæ диссаджы рагон архитектурæ бахъахъхъæнын, уыимæ, скъолайы цæмæй фæзыной нырыккон технологитæ æмæ гæнæнтæ. Афтæмæй, нырыккон ахуырадон кусæндон нæм куы фæзына, уæд уый уыдзæн хорз бавæрæн Горæтгæрон районы социалон-экономикон разты, — загъта Тускъаты Таймураз.
Реконструкцигæнæн куыстыты цыд Хицауады Сæрдар банымадта хорзыл æмæ бафиппайдта, пъланмæ гæсгæ кæй цæуынц, уый.
РЦИ-Аланийы
Сæргълæууæджы æмæ Хицауады
пресс-службæ
