Цæгат Кавказы федералон зылды ахуыргæнджытæ кæм архайдтой, уыцы профессионалон конкурс «Фидæны ахуыргæнæг»-ы регионалон æрдæгкæронбæттæн фæци.
Конкурс арæзт æрцыд Уæрæсейы Федерацийы Рухсады министрады æххуысæй æмæ ацыд Грознайы. Ерыс дзы кодтой 52 командæйы. Архайдтой дзы зылды æхсæз регионы минæвæрттæ: 19 командæйы — Стъараполы крайæ, 12 командæйы — РЦИ-Аланийæ, 12 — Цæцæнæй, 5 — Дагестанæй, 3 — Кæсæг-Балхъарæй æмæ иу командæ — Хъæрæсе-Черкесты Республикæйæ.
Конкурсы кæронбæттæнмæ нæ республикæйæ рацыд æртæ командæйы: Мæздæджы 8-æм астæуккаг скъолайы командæ (Каринэ Кухужева, Наталья Балкарова, Ольгæ Литовская), Беслæны æмæ Алагиры районы Црауы астæуккаг скъолаты командæтæ (Гæззаты Наталья, Быценты Верæ, Дзгойты Замирæ) æмæ Дзæуджыхъæуы 47-æм астæуккаг скъолайы командæ (Татьянæ Шиловская, Дыгъуызты Витали, Æгъуызарты Зæлинæ).
— Кæронбæттæнмæ чи рацыд, уыдоны ‘хсæн мах командæйы дæр куы ранымадтой, уæд нæ цинæн кæрон нал уыд. Стыр æхсызгон нын уыд, иннæ ахургæнджытимæ кæй базонгæ стæм, иумæ конкурсы кæй архайдтам, уый. Се ‘ппæт дæр сты æрыгон, фæлæ фæлтæрдджын ахуыргæнджытæ. Ахæм конкурс чи сарæзта, уыдонæн та уæлдай бузныг, — зæгъта Æгъуызарты Зæлинæ.
Конкурсы кæронбæттæнмæ рацæуæг ахуыргæнджытæн арфæ ракодта нæ республикæйы ахуырад æмæ наукæйы министр Людмилæ Башарина:
— Ахæм хорз бæрæггæнæнтæ сæ къухы кæй бафтыд, уый тыххæй нæ ахуыргæнджытæн арфæ кæнын. Бузныг сын, сæхи ахæм сæрæнæй кæй равдыстой æмæ тынг дæсны кæй разындысты, уый тыххæй.
Конкурсы кæронбæттæн уыдзæн апрелы. Йæ архайджыты бахъæудзæн ацæуын æртæ къæпхæны. Уæлахиздзаутæ уыдзысты, се ‘ртæйы дæр æнтыстджынæй чи ацæуа, 30 ахæм командæйы.
ГÆЛÆУТЫ Наталья
