Республикæ Цæгат Ирыстон-Аланийы фарæстæм кълæсты рауагъдонтæ равзæрстой, бындурон паддзахадон фæлварæнты рæстæг цавæр предметтæ дæтдзысты, уыдон. 2020 азы бындурон паддзахадон фæлварæнтæ дæттыны тыххæй куырдиæттæ балæвæрдтой 7290 фарæстæмкъласоны.
Йе ‘нæниздзинады гæнæнтæ цыбыр кæмæн сты, ахæм рауагъдонтæ, инвалидтæ æмæ, æхгæд хуызы сæрмагонд ахуырадон-хъомыладон кусæндæтты чи ахуыр кæны, уыдонæн сæ бон у паддзахадон рауагъдон фæлварæны хуыз равзарын. Ацы аз сæ барвæндæй спайда кодтой 89 адæймаджы. Фæлварæны чи архайдзæн, уыдонæй æппæты фылдæр 2020 азы хыгъд æрцыд Дзæуджыхъæуы — 3205, æппæты къаддæр та Æрæфы районы — 127 адæймаджы.
Аттестат райсыны тыххæй фарæстæмкъласонты хъæуы 4 предметы раттын: æнæмæнг — уырыссаг æвзаг æмæ математикæ, дыууæ та — барвæндæй.
«Ацы аз фарæстæм къласы рауагъдонты æхсæн æппæты зындгонддæр предметтæ систы: æхсæнадзонынад, дæтдзысты йæ 5329 адæймаджы, географи — 2840, биологи — 1885, информатикæ — 1600, хими — 803. Æнæхъæнæй райсгæйæ, ацы нымæцтæ æввахс сты ивгъуыд азы бæрæггæнæнтæм», — зæгъы РЦИ-Аланийы ахуырад æмæ наукæйы министр Людмилæ Башарина.
Скъоладзаутæ къаддæр æргом кæмæ здахынц, уыцы предметтæ сты немыцаг æмæ францаг æвзæгтæ. Равзæрстой сæ 4 рауагъдоны.
Бындурон паддзахадон фæлварæн цæудзæн 22 майæ 30 июнмæ. РЦИ-Аланийы Ахуырад æмæ наукæйы министрады бындурон паддзахадон фæлварæны æмæ иу паддзахадон фæлварæны тыххæй фарстытæ радтæн ис, комкоммæ телефонæй бадзургæйæ: 5 53-49-40.
ГÆЛÆУТЫ Наталья
