Дзæуджыхъæуы Сабырдзинады проспекты дарддæр цæуынц цалцæггæнæн куыстытæ. Аразджытæ ныртæккæ ног къæйдуртæй æмбæрзынц Сæрибары фæз.
Ныртæккæ æххæстгонд цæуы Сабырдзинады проспекты рацарæзты фыццаг къæпхæн. Ацы æмвæзадыл Уæлахизы боны агъоммæ гранитон къæйдурæй æрæмбæрздзысты Сæрибары фæз æмæ проспекты хай Церетелийы уынгæй Горькийы уынджы онг.
«Подрядон организацийы кусджытæ ныртæккæ аив къæйдуртæй æмбæрзынц Сæрибары фæз. Куыстыты пъланы ивддзинæдтæ нæй — раздæр куыд нысангонд уыд, афтæмæй уыцы куыст хъуамæ ахицæн уа 1 маймæ», — радзырдта Дзæуджыхъæуы бынæттон хиуынаффæйады администрацийы арæзтады управленийы хицау Беслехъоты Зауырбег.
Йæ ныхасмæ гæсгæ, Сабырдзинады проспектыл ныридæгæн æвæрын райдыдтой ног цырæгъты аивдæр телыхъæдтæ. Уыцы телыхъæдтæм баиу кæндзысты трамвайты хæтæлтæ дæр.
Зындгонд куыд у, афтæмæй Сабырдзинады проспекты рацарæзтæн горæты бюджетæй радих кодтой 150 милуан сомы бæрц.
Нæ уацхæссæг
