Уалдзæджы комулæфтимæ сæ тыхы сабыргай бацыдысты быдырон куыстытæ. Ныридæгæн федералон æмвæзады уæлдæр Хицауады ныхас рауадис уалдзыгон быдырон куыстыты рæстæг хъæууонхæдзарадон продукциуадзджытæн баххуыс кæныныл.
Уæрæсейы хъæууон хæдзарады министр Дмитрий Патрушев куыд бацамыдта, афтæмæй куыстытæ бæрзонд æмвæзадыл конд куы ‘рцæуой, уæд Уæрæсейы хор кадавар нæ уыдзæн, халсартæ æмæ дыргътæ хъуаг дæр нæ уыдзыстæм. Ныридæгæн уал техникæ скуыста 17 регионы быдырты, куыст цæуы æнæкъуылымпыйæ.
Афойнадыл бацæттæ кодтой тауыны мыггæгтæ, минералон хъацæнтæ, техникæйы цæттæдзинад у 88 проценты. Цæмæй 100 процентмæ схæццæ уа, ууыл архайынц, артаджы бæрц фаронимæ абаргæйæ у фылдæр.
Цæгат Ирыстоны фæззыгæнд байтыдтой 700 мин гектары. Тауыны фæзуæттæ ацы аз 790 мин гектары фылдæр фесты. Сæ уавæр у хорз, ныртæккæ уал республикæйы аграритæ мæнæу æмæ хъæбæрхоры хуымтæм хæссынц хъацæнтæ. Ацы фæззыгæнды культурæты иумæйаг фæз у 33,7 мин гектары. Азотхъæстæ хъацæнтæй сæ афойнадыл куы бафсадой, уæд фæззыгæндты уавæр ноджы фæхуыздæр уыдзæн. Ныртæккæ Алагиры районы хъацæнтæй фæхъæздыгдæр кодтой фæззыгæндты 200 гектары, Æрыдоны районы — 84 гектары, Кировы районы — 450 гектары, Мæздæджы районы — 15 мин гектары, Рахизфарсы районы — 1173 гектары, Горæтгæрон районы — 490 гектары.
Иннæ культуртæ тауынмæ бавналдзысты, мæры температурæ æмæ уымæлад технологон домæнты аккаг куы суа, уæд. Минералон хъацæнтæй æфсисад хæццæ кæны 46 процентмæ, тауыны мыггæгтæй — 91 проценты. Цæмæй къуылымпыдзинæдтæ ма баййафой, уый тыххæй хъæугæ хъацæнтæ æмæ мыггæгтæ республикæмæ ласынц.
Уалдзыгон быдырон куыстытæ кæндзысты 776 тракторы, 360 хортауæны æмæ 310 культиваторы.
РЦИ-Аланийы Хъæууон хæдзарад æмæ
хойраджы министрады пресс-службæ
