Фæстаг суткæйы дæргъы коронавирусæй рынчынты нымæцыл Цæгат Ирыстоны бафтыд 18 адæймаджы. Афтæмæй хæцгæ низæфтауæгæй рынчынты нымæц республикæйы схæццæ 52 адæймагмæ.
Знон ахæм бæрæггæнæнтæ фехъусын кодтой «Роспотребнадзор»-ы цæгатырыстойнаг управленийы.
«Иу бонмæ ма дохтыртæ ноджыдæр сбæрæг кодтой коронавирусæй 18 рынчын адæймаджы. Афтæмæй, уыцы низæфтауæг кæмæ разынд, ахæм адæмы нымæц республикæйы ныртæккæ у 52», — загъта управленийы минæвар.
Уыимæ, Æнæнниздзинад хъахъхъæнынады министрады пресс-службæйы бæрæггæнæнтæм гæсгæ, Тагъд медицинон æххуысы клиникон рынчындоны коронавирусæй рынчынтæн цы бæстыхай рахицæн кодтой, уым ныртæккæ дохтырты бæрны ис 79 адæймаджы. Уыдонæй 7 адæймаджы бæлвырдæй сты коронавирусæй рынчын. Иннæты æнæниздзинады уавæр дæр дарддæр бæрæггонд цæуы.
