Æппæт дунейыл чи ахæлиу, уыцы хæцгæ низы амæттæгты нымæц кæны фылдæрæй-фылдæр. Турчы цы уавæр сæвзæрд, æмæ дзы ирæттæ ацы низæн куыд фæразынц, уый тыххæй дзуры Хуссар Ирыстоны æххæстбарджын минæвар Турчы ХЪАНЫХЪУАТЫ Ремзи.
— Ныридæгæн нæм тæссаг низы аххосæй амард фондзсæдæ адæймагæй фылдæр. Хъыгагæн, коронавирусы ныхмæ хос нæма æрхъуыды кодтой. Уымæ гæсгæ, адæймагæн йæ хæс у хæдзары бадын æмæ йæхи бахъахъхъæнын. Ахсджиаг хъуыддаджы тыххæй, æддæмæ рацæугæйæ, та æдасдзинады домæнтæ æххæст кæнын. Турчы университеттæ æмæ скъолатæ, кафетæ æмæ мæзджыттæ æхгæд сты. Адæм куыстмæ цæуынц, 65 азæй хистæртæ æмæ 20 азæй кæстæртæ та сæ хæдзæртты бадынц. Горæтты æхсæн транспорт нæ цæуы. Сæхи транспортæй цæуынц, æрмæстдæр бардæттæг гæххæттытæ кæмæ ис, уыдон. Мызд исыны хъуыддаг дæр у æвзæр. Куыстуæттæн сæ фылдæр сты хицæн адæймæгты къухы. Цæмæй кусæг йæ хицауæй æххуыс бацагура, уый тыххæй йæм хъуамæ æппынкъаддæр бакуса 300 боны.
Коронавирус адæмыл фæбæрæг вæййы алы хуызты. Кæуыл бахæцы, уыцы адæмæй иуæй-иутыл йæ бæрæггæнæнтæ нæ раргом вæййынц, афтæмæй низ иннæтыл бахæцын кæнынц. Стæмтæй фæстæмæ коронавирусæй Турчы амардысты ацæргæ адæймæгтæ. Рынчын чи уыд æмæ чи сдзæбæх, иу ахæм сылгоймаг телевизорæй йе ‘мбæстæгтæн бафæдзæхста æдасдзинады домæнтæ æххæст кæнын. Сылгоймаг æмæ йæ лæгыл коронавирус бахæцыд се ссæдзаздзыд лæппуйæ, афтæмæй уый йæ низ æнкъаргæ дæр нæ бакодта, йæ ныййарджытæ та дзы тыххæйты аирвæзтысты. Ныртæккæ туркæгтæн зианмæ цæуыны бар дæр нæй. Уæлмæрдтæм зиан аласынц цалдæр хионы.
Зын уавæры ирæттæ кæрæдзийæн баххуыс кæнынц, фæлæ ныртæккæ бирæгæйттæй æмбырд кæнын тæссаг у. Уæвæн ис, æмæ стыр æмбырд фыдбылыз расайа. Уымæ гæсгæ зианмæ нæ бацæуын худинаг нæу. Мæхæдæг хауын хистæр фæлтæрмæ æмæ мæ хæдзары бадын, уымæн æмæ мæ бинонтæн тæрсын. Рæхджы ахуыргæндтæ коронавирусы ныхмæ хос кæй ссардзысты, æмæ иумæйаг хъарутæй тæссаг низыл кæй фæуæлахиз уыдзыстæм, ууыл мæ зæрдæ дарын.
Нæ уацхæссæг
