Хицауады хæдзары уыд радон æмбырд. Ныхас дзы цыд ацы рæстæг царды уæззау уавæрты бахауæг адæмæн æххуысы мадзæлттыл. Журналистты фарстытæн дзуаппытæ лæвæрдтой республикæйы фæллой æмæ социалон рæзты министр ХУЫБИАТЫ Барис, РЦИ-Аланийы пенсион фонды разамонæджы хæдивæг Наталья ДОМАШЕВА æмæ Адæмæн куыстдæттыны республикон комитеты сæргълæууæг ПЛАТЫ Альбинæ.
Федералон æххуысмæ не ‘нхъæлмæ кæсгæйæ, республикон разамынд бацæттæ кодта царды зын уавæрты бахауæг бинонтæн баххуыс кæныны фæдыл къорд документы. Уыцы документтæм гæсгæ фиддонтæ æххæст кæндзысты республикæйы Фæллой æмæ социалон рæзты министрад, Пенсион фонд æмæ Адæмæн куыстдæттыны республикон комитет. Ахæм гæнæн дæр уыдзæн, æмæ адæм æххуыс исдзысты æртæ ведомствæйæ дæр уыцы-иу рæстæг. Хуыбиаты Барис куыд бафиппайдта, афтæмæй, сæвзæрæг уавæрты размæ дæр адæмæн цы социалон æххуыстæ уыд, уыдон дæр исдзысты, нырмæ куыд уыд, афтæ. Уыдонæй уæлдай цыбыркъух адæймæгтæн ма уыдзæн уæлæмхасæн æххуыс, æмæ, министры ныхасмæ гæсгæ, уыцы æххуыс гыццыл нæ уыдзæн. «Фиддонтимæ къуылымпытæ нæ уыдзæн», — загъта Хуыбиаты Барис.
Фæллой æмæ социалон рæзты министрад, фыццаджыдæр, æххуыс кæндзæн, 150 сомы пособи цы бинонтæ истой, уыдонæн. Уыцы бинонтæй 3-18-аздзыд сывæллæттæ кæмæн ис, уыдонæн уыцы-иу хатт лæвæрд æрцæудзæн 3 мин сомы алы сывæллоны тыххæй дæр.
Уæлæмахасæн бафыстытæ ма æмбæлы, сывæллæттæ кæмæн нæй, фæлæ низы ныхмæ мадзæлттæ аразыны ацы рæстæг æнæ куыстæй чи баззад, ахæм адæймæгтæн. Ныхас цæуы, йæ куыстæн мызд кæй иста, уымæн бæлвырд гæххæттытæ бавдисын йæ бон кæмæн нæу, ахæм адæймæгтыл. Уыдонæн лæвæрд æрцæудзæн 3-10 мин сомы, æххуысæн йæ бæрц бæлвырд кæндзæн ведомствæты ‘хсæн къамис. Куырдиат бадæттæн уыдзæн куыд гæххæттыл фыстæй, афтæ электронон хуызы дæр. Абонмæ ахæм æххуысы аккагыл нымад æрцыд 315 адæймаджы, æххуысы бæрц у 2,2 милуан сомы.
1 мартъийæ фæстæмæ официалон уагæй йæ куыстæй чи фæхауд, уыдонæн æххуыс райсын уыдзæн ноджы æнцондæр. Платы Альбинæ куыд радзырдта, афтæмæй, официалон æгъдауæй чи куыста æмæ ныр йæ куыстæй чи фæхауд, уыдонæн лæвæрд æрцæудзæн æппæты фылдæр пособи — 12130 сомы. Уыимæ, каст нæ цæудзæн, адæймаг цас рæстæг куыста æмæ цас мызд иста, уымæ. Адонæн кæд æнахъом сывæллæттæ дæр ис, уæд ма сын лæвæрд æрцæудзæн 3 мин сомы алы сывæллоны хыгъдмæ дæр. Æнæофициалон уагæй чи куыста æмæ, мызд иста, уымæн бæлвырд гæххæттытæ бавдисын йæ бон кæмæн нæ уа, уыдон та æмбæлгæ уагæвæрдмæ гæсгæ нымад æрцæудзысты æгуыстыл æмæ сын пособийы хуызы фыст æрцæудзæн æрмæстдæр 1,5 мин сомы. Фæлæ ма сын бар ис Фæллой æмæ социалон рæзты министрадæй райсын уæлдæр амынд уæлæмхасæн бафыст.
Пенсион фонды минæвар Наталья Домашева куыд радзырдта, афтæмæй пособи фиддзысты, 2017 азы 1 апрелæй 2020 азы 30 июнмæ цы сывæллæттæ райгуырд, уыдонæн. Æртæ мæйы дæргъы — апрелæй июнмæ — сын Пенсион фонд фиддзæн фæндзгай мин сомтæ. Ацы ран ныхас цæуы, ныййарæджы капитал райсыны бар кæмæн ис, ахæм бинонтыл. Уыимæ, сæ ацы барæй спайда кодтой æви нæ, уымæ каст нæ цæудзæн.
Æртæ ведомствæйы минæвæрттæ дæр куыд загътой, афтæмæй курдиæттæ бадæттыны æмæ æххуыс райсыны лæггæдтæ сты лæвар, æмæ адæм, а фæстаг рæстæг чи фæзынд, уыцы цæстфæлдахджыты къæппæджы ма бахауæнт.
Хабæрттæ ноджы бæлвырддæрæй базонæн ис ахæм телефонтæй:
тагъд æххуысы бирæканалон телефон: 8-800-200-64-44;
РЦИ-Аланийы Фæллой æмæ социалон рæзты министрад: 53-58-31;
Адæмæн куыст дæттыны комитет: 64-90-66; 64-90-56, стæй куыстдæтджытæн консультаци райсыны тыххæй телефон: 64-90-63;
Пенсион фонды бирæканалон телефон: 51-80-92 æмæ тагъд æххуысы телефонтæ: 51-57-31; 40-98-48.
Нæ уацхæссæг
