Цæгат Ирыстоны Сæргълæууæг БИТАРТЫ Вячеславы фæдзæхстмæ гæсгæ парти «Иугонд Уæрæсе»-йæ æвзæрст депутаттæ æххуыс кæнынц фæкæсинаг адæмæн.
Æрвылбон цыбыркъух æмæ бирæсывæллонджын бинонтæн, стæй иунæгæй цæрæг пенсиисджытæ æмæ сахъат адæймæгтæн радтынц æппæтæй хъæугæдæр хойрæгтæ — ссад, зети, макъаронтæ, кърупатæ, картоф, халва, сæкæр, бæзджынгонд æхсыр, цай æмæ цæхджын джитъритæ.
— Дзæуджыхъæуы сарæзтам адæмæн æххуысгæнæг 16 штабы. Разамынд сын дæттынц горæты Минæвæртты æмбырды депутаттæ. Фæкæсинаг адæмы (низы аххосæй зын уавæры бахауджыты) номхыгъдтæ саразæм. Нæ сæйраг хæс у æнæфтиагæй баззайæг адæмы цард фенцондæр кæнын. Æппæт депутаттæ дæр архайынц æххуысгæнæн акцийы. Не ‘ргом здахæм адæмы æппæт куырдиæттæм дæр, — зæгъы Дзæуджыхъæуы Минæвæртты æмбырды депутат Тыбылты Анатоли.
— Мæ куыстæй фæхаудтæн æмæ пенсийæ дарддæр ницы исын. Мæ бинонты цæмæй дарон, уый нæ зонын. Кæй нын æрбахастой, хойрагæй уыцы æххуыс нын нæ цард цыбыр рæстæгмæ фенцондæр кæндзæн, — загъта бирæсывæллонджын мад, идæдз ус Гæдзаонты Мæдинæ.
— Ацы бинонтæм ис æхсæзæмкъласон чызг. Уый, æнæмæнг, хъæуы къæнцыларон дзаумæттæ, æмæ йын сæ рæхджы балхæндзыстæм. Бинонтæм дарддæр дæр нæ цæст дардзыстæм, — зæгъы партийы регионалон хайады æххæсткомы разамонæг Едзойты Марат.
Дзæуджыхъæуы Минæвæртты æмбырды депутатты ныхасмæ гæсгæ, цалынмæ хииппæрддзинады фæтк нæ аивой, уæдмæ фæкæсинаг адæмæн æххуыс кæндзысты.
ЦОМАРТАТЫ Альбинæ
