Коронавирусæй сæйæг адæмы кæм дзæбæх кæнынц, уыцы Клиникон æмæ Тагъд æххуысы рынчындæттæн радтой фæйнæ ног хæдтулгæйы. Медиктæн сæ ахсджиаг куысты тыххæй бузныг зæгъыны хуызы парти «Иугонд Уæрæсе» рынчындæттæн радта нысаниуæг «#спасибоврачам»-имæ хæдтулгæтæ.
Ныридæгæн рынчындæттæ транспортæй кæй пайда кæнынц, уый фæрцы дохтыртæн ис адæмæн медицинон æххуыс раздæрæй цыбырдæр рæстæгмæ кæныны фадат.
— Амæй размæ нæ рынчындонмæ иунæг рог хæдтулгæ дæр нæ уыд. Кæй райстам, уыцы хæдтулгæ «Ладæ-Вестæ»-йæ цæудзыстæм канд дзæуджыхъæуккаг нæ, фæлæ хъæууон районты рынчынтæм дæр. Раздæр нæ-иу бахъуыд такси æххуырсын, ныр та пайда кæндзыстæм ног хæдтулгæйæ. Уымæй уæлдай ма нын уыдзæн хостæ, медицинон ифтонггæрзтæ æмæ гæххæттытæ раздæрæй рæвдздæр ласыны фадат дæр, — зæгъы Республикон клиникон рынчындоны сæйраг дохтыр Митциты Астан.
Уæ зæрдыл уын лæууын кæнæм: амæй размæ партионтæ Тагъд медицинон æххуысы дохтыртæн радтой хъахъхъæнæн маскæтæ.