Коронавирусы уавæр цы бон расидтысты, уыцы бонæй фæстæмæ медколледжы ахуырдзаутæ, медицинон академийы æмæ æндæр уæлдæр скъолаты студенттæ, стæй «Иугонд Уæрæсе»-йы активисттæ æххуыс кæнын райдыдтой фæкæсинаг адæмæн. Æрвылбон зын уавæры бахауæг адæм бархионтæм æххуысы фæдыл дзырдтой.
Фæсивæд иунæгæй цæрæг пенсиисджытæм, бирæсывæллонджын бинонтæн æмæ сахъат адæмæн ластой хойраг, хостæ æмæ æндæр хъæугæ дзаумæттæ. Уымæй уæлдай ма сын бархионты ‘рдыгæй уыд æндæр æххуыс дæр.
— Бархионты центр Дзæуджыхъæуы цы бон байгом, уыцы бонæй — ома, 26 мартъийæ — фæстæмæ бакуыcтам æхсæзсæдæ куырдиатæй фылдæрыл. Адæм нæм дзырдтой канд æххуысы фæдыл нæ, фæлæ бархионтæн арфæ ракæныны тыххæй дæр. Тæссаг уавæрты архайгæйæ, æрвылбон бархионты хæстæ зæрдиагæй чи æххæст кодта, абон уыцы фæсивæдæн бузныджы фыстæджытæ радтам. Æрыгæттæ сæхи куыд хъуамæ дарой, ацы лæппутæ æмæ чызджытæ сæ зæрдиаг архайдæй уый равдыстой. Чи сæм фæзынд, уыцы фæлтæрддзинад сын сæ дарддæры царды фæпайда уыдзæн, мах та сын æппæтвæрсыг æххуыс кæндзыстæм. Нæ парти уæлдæр ахуыргæнæндæтты разамындæн бафæдзæхста æмдзæрæнты фиддонтæ фидынæй бархионты ссæрибар кæнын, социалон стипендитæ уарыны рæстæг сын сæ бархион архайд банымайын, — загъта партийы регионалон хайады æххæсткомы разамонæг Едзойты Марат.
— Вазыгджын уавæр нымайгæйæ, ме ‘ххуыс канд нæ республикæйæн нæ, фæлæ æппæт бæстæйæн дæр кæй фæпайда уыдзæн, уый куы бамбæрстон, уæд бархион суæвыны фæнд скодтон. Кæмæн баххуыс кодтон, уыцы адæмы арфæ нымайын бархионы архайды сæйраг æууæлыл. Æппæтæй æхсызгондæр-иу мын уыд хииппæрддзинады домæнтæ æххæстгæнæг ацæргæ адæймæгты æхцон цæстæнгас. Хатгай-иу мæ ныййарджытæ рад хæссынмæ нæ уагътой, фæлæ адæм ме ‘ххуысхъуаг кæй сты, ныййарджытæн-иу уый бамбарын кодтон, — зæгъы бархионтæй иу — Цæгат Кавказы хæххон-металлургон институты студент Коцты Марат.
— Бархионы хæстæ æххæст кæнгæйæ, æрвылбон ногдзинæдтæ рахатын æмæ æппæт бæстæйы ссарын ног хæлæртты. Нæ хæс у æххуысхъуаг адæмыл аудын. Егъау командæйы уæнгыл мæхи нымайыны бар мын кæй ис, уымæй райгонд дæн, — загъта 19-аздзыд бархион Бæройты Сослан.
ЦОМАРТАТЫ Альбинæ
