Мæздæджы сæрмагонд скъола-интернаты директор Наталья МИРОНЕНКО куыд фехъусын кодта, афтæмæй, фондз нырыккон æрмадзы кæм уыдзæн, уыцы ахуыргæнæндоны агъуыстытæ сцалцæг кодтой.
Сентябрæй фæстæмæ скъола пайда кæнын райдайдзæн профессион-фæллойадон ахуыры нырыккон программæтæй мæнæ ахæм къабæзтæм гæсгæ: хуыйæн æмæ къахыдарæсы куыст, бæстыхæйттæн лæггад кæныны, стæй рæсугъдгæнæн-куыстадон аивад. Национ проект «Ахуырад»-мæ хауæг федералон проект «Нырыккон скъола»-мæ гæсгæ æрмадзтæн балхæдтой федералон бюджетæй дихгонд 7,8 милуан сомы аргъ ифтонггæрзтæ.
— Мæздæджы интернат нæ республикæйы нымад у национ проект «Ахуырад»-мæ гæсгæ, æнæниздзинады цыбыргонд гæнæнтимæ сывæллæттæн уавæртæ кæм аразынц, дыккаг ахæм ахуыргæнæндоныл. Хъус æмæ цæстæй рæвдз чи нæу, фарон ахæм сывæллæттæн Дзæуджыхъæуы реабилитацион-ахуырадон центры фæзындысты агропромышленнон æмæ полиграфион æрмадзтæ, стæй хъæбæр гæххæттытæй кусæн хайад. Хъуыддæгтæ куыд равдыстой, афтæмæй, профориентацион къабазæй разы уæвгæйæ, сывæллæттæ æхсызгонæй архайынц æрмадзты, — загъта нæ республикæйы ахуырад æмæ наукæйы министр Людмилæ Башарина.
Августы интернат ног кусæнгæрзтæй сифтонг кæндзысты. Уымæй уæлдай ма балхæдтой 10 ноутбукы æмæ сæ сæвæрдзысты компьютерон къласы.
— Федералон проект «Нырыккон скъола»-мæ гæсгæ нæ ахуыргæнæндон кæм архайы, уыцы дыккаг æппæтуæрæсеон конкурс «Доброшкола»-йы фыццаг хай кæронмæ ахæццæ, дыккаг хай та райдайдзæн сентябры. Нæ интернаты ахуырдзаутæ профессион зонындзинæдтæ райсынмæ кæй тырнынц, уый нымайгæйæ, ацы проекты фæрцы махæн ис райрæзты ног къæпхæнмæ схизыны фадат, — зæгъы Наталья Мироненко.
Ныртæккæ интернаты ахуыр кæны 195 сывæллоны. Национ проект «Ахуырад»-ы мадзæлттæ баххæст кæныны фæрцы ацы сывæллæттæн уыдзæн фæллойы базары хъæугæ дæсныйæдтæм сæхи бацæттæ кæныны фадат.
ГÆЛÆУТЫ Наталья
