Сӕрды фӕстаг мӕй фӕвӕййы, ӕмӕ нӕ алфамбылай бынӕттӕм куы афӕлгӕсӕм, уӕд сӕ кӕмдӕриддӕр фендзыстӕм аив нывӕфтыд хъулон-мулон уӕлӕдарӕсы. Фӕлӕ, махӕн зӕрдӕрухсы ӕнкъарӕнтӕ ӕмӕ ӕнӕниздзинад чи хӕссы, уыцы алӕмӕты рӕсугъд зайӕгойтӕм ӕввахс арӕх фенӕн вӕййы, хицӕн адӕймӕгтӕн хъизӕмӕрттӕ ӕвзарын чи фӕкӕны, ахӕм хӕмпӕлгӕрдӕджытӕ.
Ныхас цӕуы, махӕй алчидӕр иттӕг хорз кӕй зоны, уыцы ӕнӕхайыры амброзийыл. Фыццагдӕр фӕзынд Цӕгат Америчы, фӕстӕдӕр та ныппырх бирӕ бӕстӕтыл, ӕмӕ ныртӕккӕ кӕмдӕриддӕр нымад у карантинон зайӕгойыл. Цӕмӕн куы фӕрсат, уӕд, дидинӕг калыны рӕстӕг йӕ рыг аллергион низ-поллиноз, зӕгъгӕ, кӕй ӕвзӕрын кӕны, уый тыххӕй. Адӕймаг уымӕй тынг фехснырсы, хъустӕ ӕмӕ фындз сӕхгӕнынц, цӕстысыгтӕ фезгъӕлынц, сӕр фӕриссы, фылдӕр хатт буары тӕвд уӕлӕмӕ схизы.
Уымӕй уӕлдай амброзийы рыгӕй рынчын кӕнынц хъуыры астмӕйӕ, ӕндӕр ӕбуалгъы низтӕй. Статистикон бӕрӕггӕнӕнтӕ куыд дзурынц, афтӕмӕй аллергийӕ рынчынтӕ азӕй-аз фылдӕр кӕнынц фондз хатты, ӕмӕ уый ӕвзӕрӕрдӕм зыны бӕстӕйы экономикӕйы рӕзтыл.
РЦИ-Аланийы ӕнӕниздзинад хъахъхъӕнынады министрады нын куыд радзырдтой, афтӕмӕй поллинозӕй рынчынты бӕрӕггӕнӕнтӕ (100 мин цӕрӕджы хыгъдмӕ) кӕд Цӕгат Ирыстоны дӕлдӕр сты Цӕгат Кавказы федералон зылды, уӕддӕр рӕстӕмбис нымадӕй 30 проценты фылдӕр у, Уӕрӕсейы цас у, уымӕй. Специалисттӕ фӕстаг рӕстӕг фӕдисы дзӕнгӕрджытӕ цӕгъдынц: кӕд ӕрӕджы дӕр ма амброзийы дидинджыты рыг хъыгдардта хистӕр адӕмы, уӕд ныр та диагноз поллиноз дохтыртӕ сӕвӕрынц чысыл сывӕллӕттӕн дӕр.
Цымӕ афтӕ цӕмӕн у? Сӕйраг аххосӕгтӕй иу специалисттӕ бӕттынц амброзиимӕ — зайӕгойты ӕхсӕн тӕккӕ карздӕр низӕвзӕрынгӕнӕгимӕ. Уымӕн ӕмӕ уый дзӕнӕты ран ссардта нӕ республикӕйы дзаджджын зӕххыл. Куыд зонӕм, афтӕмӕй амбрози йӕ быны фӕкӕны хуымтӕ, дыргъдӕттӕ, ӕмӕ уымӕй бӕлвырд къаддӕр фӕвӕййы хъӕууонхӕдзарадон культурты тыллӕг. Иу сезонмӕ уый гектарӕй дон бацъиры 900 тоннӕйы, пайдайаг буаргъӕдтӕ та «аныхъуыры», минералон хъацӕнты аст центнеры цас ис, уый бӕрц. Уымӕ гӕсгӕ карантинон зайӕгойты ныхмӕ кӕмфӕнды дӕр тох кӕнын хъӕуы ӕнауӕрдонӕй.
Раздӕр азты амброзиимӕ тох кӕнынмӕ стыр ӕргом здӕхт цыд. Хицаудзинады бынӕттон оргӕнтӕ-иу уынаффӕ рахастой ацы тӕссаг зайӕгойы ныхмӕ мадзӕлттӕ саразыны тыххӕй. Санитарон службӕтӕ та-иу куыстуӕттӕ ӕмӕ организациты минӕвӕрттимӕ бӕрӕг кодтой уавӕр, ӕмӕ-иу, амбрози куынӕггонд кӕм нӕ цыд, уыцы куыстуӕтты разамонджытӕ ӕмӕ хиӕххуысадон хӕдзарӕдты хицӕутты арӕх ивар кӕнын бахъуыд. Уымӕй уӕлдай стыр ӕмбарынгӕнӕн куыст цыд адӕмы ӕхсӕн, зӕгъгӕ, амбрози у тӕссаг хӕмпӕлгӕрдӕг, ӕмӕ йӕ бындзарӕй куынӕг кӕнын хъӕуы.
Ныр ахӕм ӕппӕтвӕрсыг архайдмӕ йӕ хъус ничиуал дары. Уымӕ гӕсгӕ амбрози сарӕх нӕ республикӕйы алы ран дӕр. Уӕлдайдӕр — цӕрӕнбынӕтты алфамбылай, цӕугӕдӕтты атагъаты. Ӕнӕхъӕн плантацитӕ дзы фенӕн ис Дзӕуджыхъӕуы арӕзтӕдты, 18 микрорайоны ӕнӕласт сыджыты обӕутты, чи нал кусы, уыцы промышленнон куыстуӕтты кӕртыты ӕмӕ бирӕ ӕндӕр рӕтты.
Хъыгагӕн, ацы карантинон зайӕгойы ныхмӕ тох кӕнын ӕнцон нӕу. Хъыгдард куы нӕ баййафы, уӕд дидинӕг калын райдайы июлы дыккаг ӕмбисӕй суанг ӕрӕгвӕззӕгмӕ. Иу зайӕгой та ӕппӕты фылдӕр радты 100 мин мыггаджы, ӕмӕ, кӕд дыккаг аз сӕ фылдӕр хай нӕ разайы, уӕддӕр сӕ цардхъомдзинад хъахъхъӕд ӕрцӕуы 40 азы бӕрц. Уымӕ гӕсгӕ амбрози фесафынӕн йӕ хуыздӕр хос у мӕрмӕ нырыккон химион буаргъӕдтӕй (гербицидтӕй) базилын, цӕмӕй йӕ кой, йӕ хъӕр дӕр мауал уа нӕ алыварс ӕрдзон бынӕтты.
Фӕлӕ ныртӕккӕйы гӕвзыкк царды ахӕм мадзал у тынг зынаргъ, фӕрӕзтӕ та нӕй. Уымӕ гӕсгӕ ацы зайӕгой куынӕг кӕнынӕн хуыздӕр гӕнӕн у бындзарӕй йӕ тонын, сӕрды ӕмӕ йӕ фӕззӕджы мӕйты уӕлӕмӕ скаст ма уадзын. Хъуамӕ республикӕйы алы куыстуат ӕмӕ организацийы разамонӕг, стӕй алы цӕрӕг дӕр архайа карантинон хӕмпӕлгӕрдӕг амбрози фесафыныл, цӕмӕй фервӕзӕм тӕссаг низ — аллергияйы хъизӕмарӕй.
Тохсырты Къоста
