Ӕрвылаз дӕр августы мӕйы арӕзт цӕуы нӕ бӕстӕйы ахуырады кусджыты конференци. Знон ахӕм егъау ӕмбырд нӕ республикӕйы ахуыргӕнджытӕн уыд Дзӕуджыхъӕуы бынӕттон хиуынаффӕйады администрацийы.
Архайдтой дзы РЦИ-Аланийы Сӕргълӕууӕг Битарты Вячеслав, РЦИ-Аланийы Парламенты Сӕрдар Алексей МаЧнев, РЦИ-Аланийы Хицауады Сӕрдары хӕдивӕг Иринӕ Азимова, РЦИ-Аланийы ахуырад ӕмӕ наукӕйы министр Людмилӕ Башарина, УФ-йы рухсады министры хӕдивӕг Алексей Корнеев, нӕ республикӕйы ӕхсӕнадон организациты минӕвӕрттӕ, скъолаты директортӕ ӕмӕ уӕлдӕр ахуыргӕнӕндӕтты ректортӕ.
Уӕрӕх ӕмбырды ныхас цыдис ног ахуыры азы уавӕртыл, ахуырады системӕйы ивддзинӕдтӕ ӕмӕ коронавирусӕй рӕзгӕ фӕлтӕры бахъахъ-хъӕныны мадзӕлттыл.
Ирыстоны ахуыргӕнджытӕн ног ахуыры азы къӕсӕрыл зӕрдиаг арфӕ ракодта РЦИ-Аланийы Сӕргълӕууӕг Битарты Вячеслав. Уый фӕстӕ биноныг радзырдта, нӕ республикӕйы разамынд ӕмӕ Ахуырады министрады ӕрдыгӕй ахуырады къабазы цы фарстытӕ ӕххӕстгонд цӕудзӕн, уыдоныл куыд кусдзысты, уый фӕдыл. Битары-фырт хатдзӕгтӕ скодта ивгъуыд азы архайдӕн дӕр.
Уый радзырдта: “Нӕ республикӕ бирӕ национ проекттӕ ӕмӕ паддзахадон программӕты архайы. Уыдоны фӕрцы нӕ социалон фарстытӕ ӕххӕст кӕнын нӕ къухы ӕфты. Сӕйрагдӕр, сывӕллӕтты ахуырӕн иттӕг хорз фадӕттӕ аразын, цӕмӕй нырыккон техникон уавӕрты къуылымпыдзинӕдтӕ ма ӕвзарой сӕ ахуыры фӕндагыл. Ацы аз йӕ тыхы бацӕудзӕн паддзахадон программӕ «Земский учитель». Иууылдӕр хорз зонӕм, абон хъӕууон скъолаты ахуыргӕнджытӕ кӕй нӕ фаг кӕны, уый. Ныры онг нӕ республикӕйы Ахуырады министрадмӕ уыцы программӕйы архайыны фӕдыл куырдиӕттӕ балӕвӕрдтой 25 адӕймаджы. «Земский учитель»-ы вакансийы бынӕттӕ та нӕм ис 16. Программӕйы фӕрцы нӕ къухы ӕфтдзӕн курдиатджын ахуыргӕнджыты фылдӕр бӕрӕг кӕнын ӕмӕ сын фӕсвӕд хъӕуты куыстӕн ӕмбӕлгӕ уавӕртӕ аразын. Ацы аз нӕ бӕстӕйы Президент Владимир Путинимӕ фембӕлды рӕстӕг, ахуырады фарстытыл ныхас кӕнгӕйӕ, ӕрдзырдтам скъолаты хӕрӕндӕтты куыстмӕ ноджы биноныгдӕр цӕстдарыны мадзӕлттыл, скъоладзаутӕн лӕвар хъарм ӕмӕ хӕрзхъӕд хӕринаг цӕттӕ кӕныны хъуыддагыл. Ӕппӕт хӕрӕндӕттӕ дӕр нырыккон техникӕйӕ сифтонг кӕнын ӕмӕ афтӕмӕй рӕзгӕ фӕлтӕрӕн ӕмбӕлгӕ уавӕртӕ саразыныл. Ныхас цыдис, кълӕстӕн разамынд чи дӕтты, уыдонӕй алкӕй мыздмӕ дӕр федералон бюджетӕй 5 мины бафтауын, регионалон бюджетӕй та — 2 мин сомы. Ацы ӕххуыстӕ фыст цӕудзысты, куыд уӕлӕмхасӕн.
Ныртӕккӕ ӕппӕты сӕйрагдӕр у сывӕллӕтты коронавирусӕй бахъахъхъӕнын. Ӕнӕмӕнг, ӕххӕст кӕнын хъӕуы, “Роспотребнадзор” цы домы, уыцы санитарон-эпидемиологон фарстытӕ, дезинфекцигӕнӕн мадзӕлттӕ.
Паддзахадон программӕтӕ ӕмӕ нацпроектты бындурыл нӕ республикӕйы арӕзт ӕмӕ цалцӕггонд цӕуынц ног скъолатӕ. Байгом кодтам, математикӕ, физикӕ ӕмӕ химийы наукӕты ӕнтыстджын къахдзӕфтӕ чи кӕны, уыцы курдиатджын сывӕллӕттӕн сӕрмагонд скъолатӕ. Алы хъӕугӕ техникӕйӕ ифтонггонд сты. Ацы аз нӕм фӕзындзӕн нымӕцон ахуырад дӕр. Уыцы ахуырад стыр ахъаз у сывӕллоны критикон ӕмӕ креативон хъуыдыкӕнынады фӕлтӕрддзинадӕн”.
Конференцийы архайджытӕн видеоцӕстдарды фӕрцы арфӕ ракодта Уӕрӕсейы Федерацийы рухсады министр Сергей Кравцов. Куыд радзырдта, афтӕмӕй абон нӕ бӕстӕйы коронавирусы аххосӕй цы уавӕр сӕвзӕрд, уый уӕлдай тынгдӕр фӕзынд ахуырады къабазы куыстыл.
— Ахуыры азы фӕстаг дыууӕ мӕйы скъоладзаутӕ уыдысты дӕрддзӕф уавӕры, ӕмӕ бирӕ къуыхцытӕ бавзӕрстам. Уый уыдис ӕнӕнхъӕлӕджы, ӕмӕ нӕ бӕстӕйы цӕрджыты сагъӕсы бафтыдта, скъолаты традицион ахуыр кӕй нал уыдзӕн, фӕлӕ — дӕрддзӕф. Скъолатӕ, куыд куыстой раздӕр традицион бындурыл, афтӕ кусдзысты дарддӕр дӕр! Уӕдӕ ма цӕмӕн аразӕм ног скъолатӕ? Ахуырады системӕмӕ бирӕ ног ивддзинӕдтӕ бахастам, хуыздӕрӕрдӕм чи сахаддзӕн, ахӕм проекттӕ, — загъта Сергей Кравцов.
Нӕ республикӕйы ахуыргӕнджытӕн зӕрдиаг арфӕтӕ ракодта РЦИ-Аланийы Парламенты Сӕрдар Алексей Мачнев дӕр. Уый радзырдта, ахуыргӕнӕджы дӕсныйад уӕлдай ахсджиагдӕр ӕмӕ вазыгджындӕр кӕй у нӕ царды, уый фӕдыл. Ӕрымысыд йӕхи ӕвзонг азтӕ, йӕхи ахуыргӕнджыты, Фыдыбӕстӕйы Стыр хӕсты дӕр йӕ куыст чи нӕ ныууагъта ӕмӕ уыцы тӕссаг уавӕрты рӕзгӕ фӕлтӕры зонындзинӕдты дунемӕ ӕдӕрсгӕйӕ чи хуыдта, уыцы хистӕрты.
— Абоны скъоладзаутӕн ӕмӕ ахыргӕнджытӕн хорз уавӕртӕ ис, ивгъуыд замантимӕ сын абарӕн дӕр нӕй. Ӕмӕ ма ноджы ӕрвылаздӕр нӕ республикӕйы разамынд архайы ахуырады системӕйы рӕзт бӕрзонддӕр кӕныныл. Ноджы хуыздӕр, ноджы ахадгӕдӕр мадзӕлттӕ хаст ӕрцыдысты ахуырады куысты пъланмӕ, ӕмӕ сыл куыст цӕудзӕн бӕлвырдӕй, — загъта Алексей Мачнев.
Дадтеты Тамилӕ
Къамтӕ систа Къӕбысты Харитон
