Ӕрыдоны уыдзӕн спортивон комплекс

0
227

Нӕ республикӕйы афӕстаг азты фылдӕрӕй-фылдӕр арӕзт цӕуынц сывӕллӕтты рӕвдауӕндӕттӕ, медицинон, культурон, спортивон ӕмӕ ӕндӕр хъӕугӕ бӕстыхӕйттӕ.

Ацы хорз хъуыддӕгтӕ арӕзт цӕуынц нӕ республикӕйы Сӕргълӕууӕг ӕмӕ Хицауады фӕрцы, ӕмӕ сӕ адӕм уый тыххӕй сты бузныг.

Спортивон бӕстыхӕйтты арӕзтӕдты номхыгъдмӕ кӕдӕй-уӕдӕй хаст ӕрцыд ӕрыдон дӕр. Кӕд, 56 азы горӕты ном хӕссы, уӕддӕр дзы абоны онг фӕсивӕдӕн нӕ уыди, ӕмбӕлгӕ уавӕрты сӕхиуыл кӕм кусой, ахӕм спортивон бӕстыхай. Цӕмӕндӕр гӕсгӕ-иу нӕ республикӕйы раздӕры разамонджытӕ ахӕм арӕзтӕдты номхыгъдмӕ ӕрыдоны, кӕнӕ хӕсгӕ нӕ бакодтой, кӕнӕ та-иу ӕй хахх акодтой. Ӕвӕццӕгӕн, ӕрыдоны разамонджытӕ ӕгӕр уӕздан кӕй уыдысты, уымӕй пайда кодтой. Афтӕмӕй, ссӕдз мин адӕймаджы кӕм цӕры, уыцы горӕты иу хуызӕнӕн спортивон зал дӕр нӕ уыд. Ӕрыдойнаг фӕсивӕдӕн нӕ уыд хъӕбысӕй хӕцынӕй, уӕззау атлетикӕйӕ, фехтованийӕ, гимнастикӕйӕ, боксӕй сӕхиуыл кӕм кусой, ахӕм бӕстыхӕйттӕ. Ахӕм уавӕр худинаг дӕр бӕргӕ уыди, фӕлӕ раздӕры хицӕутты ахӕм фарстытӕм не ‘вдӕлди.

Ныр, Ӕрыдоны астӕу, Тӕргайдоны былыл арӕзт цӕуы бирӕвӕрсыг спортивон комплекс. Районы сӕргълӕууӕг Тотраты Вячеслав нын ӕхсызгонӕй радзырдта, сӕ ацы фӕнд куыд ӕмӕ кӕй фӕрцы сырӕзт, уый тыххӕй: «Нӕ фӕсивӕдӕн спорты къорд хуызӕй сӕхиуыл кусынӕн, ӕмбӕлгӕ уавӕртӕ кӕй нӕ уыди, уый нӕ рагӕй тыхсын кодта. Зыдтам ӕй, иннӕ районты цы Спортивон галуантӕ уыдтой, уыдонмӕ куыд хӕлӕг кодтой ӕмӕ сӕм хардзау кӕй каст, ахӕм уавӕртӕ ӕрыдоны кӕй нӕ уыди, уый. Мах бӕргӕ ӕмбӕрстам, ахӕм бӕстыхай хъӕугӕ хъуыддаг кӕй у, уый, фӕлӕ нӕ къух нӕ амыдта.

Ныр нӕ фарсмӕ ӕрбалӕууыдысты РЦИ-Аланийы Сӕргълӕууӕг Битарты Вячеслав ӕмӕ нӕ республикӕйы Хицауады Сӕрдар Тускъаты Таймураз. Уыдоны фӕрцы ӕрыдон дӕр хаст ӕрцыд ӕппӕтуӕрӕсеон федералон программӕ «Спортивон инфраструктурӕйы сырӕзт»-мӕ ӕмӕ хъуыддаг йӕ бынатӕй фезмӕлыд. Ныридӕгӕн арӕзтадӕн бындур ӕвӕрд ӕрцыд ӕмӕ куыстытӕ дарддӕр цӕудзысты.

Спортивон комплексы фӕзуат проектмӕ гӕсгӕ уыдзӕн 5000 кв.м. Ӕмӕ дзы уыдзысты хъӕбысхӕсты, уӕззау атлетикӕйы, фехтованийы, боксы, гимнастикӕйы залтӕ. Уымӕй уӕлдай ам уыдзӕн баскетбол ӕмӕ волейболӕй хъазӕн зал. Проектмӕ гӕсгӕ дзы уыдзӕн, физикон цӕттӕдзинадыл кӕм кусой, ахӕм зал дӕр. Спортивон комплекс арӕзт куы ӕрцӕуа, уӕд дзы уыцы-иу рӕстӕг тренировкӕты архайыны фадат уыдзӕн 200 адӕймагӕй фылдӕрӕн.

Фидӕны нӕ зӕрды ис ленкгӕнӕн бассейн дӕр саразын. Уый дӕр у тынг хъӕугӕ хъуыддаг ӕмӕ нӕ зӕрдӕ дарӕм, ацы фарсты дӕр нӕ абоны ӕххуысгӕнджытӕ нӕ фарс кӕй рахӕцдзысты, уымӕй».

Аразджытӕ куыд зӕгъынц, афтӕмӕй, Ӕрыдоны спортивон комплекс срӕвдз уыдзӕн иннӕ аз, фӕззӕджы.

Районы сӕйраг спортивон комплексӕй, уӕлдай ма ӕрыдоны, Нартыхъӕуы, Бӕрӕгъуыны, Къостайыхъӕуы, Мичурины арӕзт цӕуынц, алцӕмӕй ифтонг чи у, ахӕм гом спортивон фӕзтӕ.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here