Америкаг линкор «Миссури»-йы 1945 азы 2 сентябры бафыстӕуыд Японы капитуляцийы тыххӕй сӕрмагонд документ. Уымӕй Дыккаг Дунеон хӕст фӕцис. Советон Цӕдисы архайды фӕрцы цӕдисонты къухы бафтыд милитаристон Японы рӕвдздӕр ӕмӕ бынтондӕр ныппырх кӕнын.
Уыцы бон фӕзынд Советон Цӕдисы Сӕйраг Советы Президиумы Указ «3 сентябр Японыл фӕуӕлахизы боныл банымайыны тыххӕй», уымӕй, ссис ӕнӕкусгӕ бон. 3 сентябры Уӕлдӕр Командӕгӕнӕг, Генералиссимус И. Сталин арфӕ ракодта Сырх ӕфсады хӕстонтӕн ӕмӕ Хӕстон-Денджызон флотӕн, Японимӕ хӕст афтӕ ӕнтыстджынӕй кӕй фӕцис, уый тыххӕй. Бӕрӕгбон ӕнӕкусгӕ уыди дыууӕ азы, Советон Цӕдисы Сӕйраг Советы Президиумы Указӕй йӕ 1947 азы 7 майы банымадтой кусгӕ боныл ӕмӕ йӕ уӕдӕй фӕстӕмӕ ахӕм кадджынӕй нал бӕрӕг кодтой.
Уӕрӕсейы Федерацийы (ФЗ-№32) «Уӕрӕсейы хӕстон намысы ӕмӕ зӕрдылдарӕн бонты тыххӕй» Японыл Уӕлахизы бон ӕппындӕр бӕрӕггонд нӕ цыд. Уӕрӕсейы Федерацийы Президент Д, Медведев 2010 азы 25 июлы бафыста Указ, ӕмӕ уымӕй 2 сентябры нӕ бӕстӕйы сфидар ис » Дыккаг Дунеон хӕст фӕуыны тыххӕй» зӕрдылдарӕн бон. Уый фӕстӕ Сахалины облӕсты разамынд сӕрмагонд ӕгъдауӕй регионалон бӕрӕгбон «Сахалины облӕст ӕмӕ Курилаг сакъадӕхтӕ ссӕрибар кӕныны бон» нал бӕрӕг кодтой.
Ацы аз, 24 апрелы, федералон закъоны фӕрцы (ФЗ-№126) фидаргонд ӕрцыд «Дыккаг Дунеон хӕст фӕуыны тыххӕй» хӕстон намысы бон. Ӕмӕ йӕ парахатӕй бӕрӕг кӕндзӕн ӕппӕт бӕстӕ дӕр.
Нӕ республикӕйы Сӕргълӕууӕг Битарты Вячеслав та рахаста, уыцы бон ӕндӕр сӕрмагонд хъуыддӕгтӕ нӕ кӕныны тыххӕй уынаффӕ. Уыцы бон Цӕгат Ирыстонӕн у зӕрдылдарӕн бон. Уӕд бацарӕфтыд сты Беслӕны фыццӕгӕм скъолайы ахуырдзаутӕ, сӕ ныййарджытӕ, сӕ хиуӕттӕ, сӕ ахуыргӕнджытӕ. Уӕдӕ терроризмимӕ тохы тыххӕй дӕр иудзинад хъӕуы равдисын.
Японыл фӕуӕлахизы тыххӕй та суанг 90-ӕм азтӕй ныхас кӕнынц, цӕмӕй уыцы бон бӕрӕггонд цӕуа нӕ бӕстӕйы. 2019 азы декабры ахӕм куырдиатимӕ В.Путинмӕ ӕрхатыдысты сӕдӕгай ветерантӕ, дардскӕсӕйнӕгтӕ, зындгонд ӕхсӕнадон архайджытӕ, ахуыргӕндтӕ, 2020 азы та — Сахалины облӕсты фондз сгуыхт ветераны ӕмӕ аст ӕхсӕнадон организацийы. Паддзахадон Думӕйы Коммунистон партийы депутаттӕ дӕр 25 июны бахастой закъоны проект. Сӕ фӕндон у, цӕмӕй 3 сентябр бӕрӕггонд цӕуа, куыд Японыл фӕуӕлахизы бон, афтӕ.
Гериты Петр,
РЦИ-Аланийы Ветеранты советы уӕнг
