Республикӕйы ӕфсӕддон комиссар Абрил Абдуллаев Цӕгат Ирыстоны Хицауады радон ӕмбырды куыд фехъусын кодта, афтӕмӕй 2019-2020 ахуыры азы ӕфсӕддон службӕйы бындуртӕм цӕттӕ кӕныны практикон ахуыртӕ республикӕйы скъолатӕ ӕмӕ профессион ахуыргӕнӕндӕтты нӕ ацыдысты.
— Ӕфсӕддон службӕмӕ цӕттӕ кӕныны хъуыддаг регионы хорз ӕвӕрд нӕу. Ӕфсӕддон ахуырады фӕткӕн фадӕттӕ ӕмбӕлгӕ уагӕй арӕзт нӕ цӕуы. Бирӕ ахуыргӕнӕндӕтты ахуырадон-материалон бындур нӕй. Зӕгъӕм, гӕрӕнты тӕлм ацӕуынӕн ифтонггӕрзтӕ хъӕууон районты ахуыргӕнӕндӕтты нӕй. «ӕфсӕддон службӕйы бындурты» предметмӕ гӕсгӕ фӕрӕзтӕ ӕмӕ хӕцӕнгӕрзтӕ нӕй. Ахуыргӕнджыты фарст у лыггӕнинаг. Ӕфсӕддон службӕйы бындурты уроктӕ амонӕг ахуыргӕнджытӕн сӕ фылдӕр ӕфсады нӕ службӕ кодтой, ӕфсӕддон службӕйы бындуртӕ амоныны фӕлтӕрддзинад сӕм нӕй. Кӕй фехъусын кодтон, уыцы лыггӕнинаг фарстыты фӕдыл нын фидӕны ӕххуыс кӕй уыдзӕн, ууыл мӕ зӕрдӕ дарын, — загъта ӕфсӕддон комиссар.
Республикӕйы Хицауады Сӕрдар Тускъаты Таймураз йӕ дӕлбар кусджытӕн бафӕдзӕхста бынӕттон хиуынаффӕйады, Ахуырады министрад ӕмӕ ӕфсӕддон хӕйтты разамонджыты ӕмгуыстадӕн фадӕттӕ саразын, фидӕны ахуыры азы фӕсивӕдӕн ӕфсӕддон цӕттӕдзинады уроктӕ ӕмбӕлгӕ уагӕй куыд амоной, афтӕ.
Нӕ уацхӕссӕг
