Сидзӕр ӕмӕ ӕнӕ ныййарджыты ӕвджид баззайӕг 12 ӕрыгон адӕймагӕн кадджын уавӕры радтой ног фатерты дӕгъӕлтӕ. Нӕ республикӕйы разамонӕг Битарты Вячеслав сын арфӕ ракодта ацы ахсджиаг цауы тыххӕй. Фембӕлд уыдис Хицауады хӕдзары.
Битарты Вячеславы ныхасмӕ гӕсгӕ, ӕрыгӕттӕн ралӕууыд диссаджы ахсджиаг рӕстӕг. «Сымах систут ног цӕрджытӕ, фӕзынд уын уӕхи фатертӕ. Уый тыххӕй райсут мӕ арфӕтӕ, ӕцӕгӕйдӕр, цинӕйдзаг бӕрӕгбон у, рагӕй йӕм ӕнхъӕлмӕ кастыстут. Хи хӕдзар райсын у ахадгӕ цау, уӕлдайдӕр та, йӕ ныййарджыты ӕххуысмӕ чи не ‘нхъӕлмӕ кӕсы, уыцы адӕмӕн. Ныр уын фӕзынд уӕхи къуымтӕ, искӕимӕ цӕрын уӕ нал хъӕудзӕн, афтӕмӕй бавналут уӕхи бинонты цард аразынмӕ дӕр», — загъта Битарты Вячеслав.
Куыд ма бафиппайдта, афтӕмӕй республикӕйы разамынд йӕ сӕйрагдӕр хӕсыл нымайы сидзӕр ӕмӕ ӕнӕ ныййарджыты ӕвджид баззайӕг сывӕллӕттӕн цӕрӕнуӕттӕ ӕлхӕныны хъуыддаг. Фӕстаг азты стыр ӕргом здӕхт цӕуы фарстмӕ. Ацы аз ног фатерты хицӕуттӕ суыдзысты 73 адӕймаджы, фатертӕ уыдзысты Дзӕуджыхъӕуы ӕмӕ республикӕйы районты.
Фӕсивӕдӕн ма раарфӕ кодтой фӕллой ӕмӕ социалон рӕзты министр Хуыбиаты Барис ӕмӕ Сывӕллӕтты барты тыххӕй ӕххӕстбарджын Кокайты Артур.
РЦИ-Аланийы Сӕргълӕууӕджы ӕмӕ Хицауады пресс-службӕ
