Зындгонд куыд у, афтӕмӕй ныртӕккӕ цалцӕггӕнӕн ӕмӕ фӕлгонцадон куыстытӕ ӕххӕстгонд цӕуынц Дзӕуджыхъӕуы Сабырдзинады проспекты. Куыстыты цыды фӕтк радон хатт сбӕрӕг кодта Цӕгат Ирыстоны Сӕргълӕууӕг Битарты Вячеслав.
Уавӕрмӕ бӕстон ӕркӕсгӕйӕ, республикӕйы разамонӕг бӕрнон ведомствӕтӕ ӕмӕ подрядон организациты минӕвӕртты размӕ бӕлвырд нысантӕ сӕвӕрдта горӕты историон хайы дарддӕры рацарӕзт ӕмӕ фӕлгонцады хъуыддаджы.
Уыцы нысантыл ныхасы бынаты архайдтой Дзӕуджыхъӕуы администрацийы сӕргълӕууӕг Фӕрниаты Тамерлан, администрацийы структурон дӕлхайӕдтӕ ӕмӕ подрядон компаниты бӕрнон кусджытӕ.
Инспекцион къорды уӕнгтӕ куыд сбӕлвырд кодтой, афтӕмӕй аразджытӕ кусынц рагагъоммӕ фидаргонд пъланы бындурыл. Зӕгъӕм, Сабырдзинады проспекты хай Мордовцевы уынгӕй Горькийы уынджы онг (йӕ дӕргъ — 400 метрӕй фылдӕр) цалцӕг кӕнынмӕ бавнӕлдтой ивгъуыд азы кӕрон. Ацы хайыл ӕппӕт нысангонд куыстытӕ куы бакӕной, уӕд та бавналдзысты проспекты иннӕ уадздзӕгтӕм. Трамвайты фӕндӕгтӕ раивынӕй уӕлдай, подрядчиктӕ кусынц Сӕрибары фӕз ӕмӕ Сабырдзинады проспекты иумӕйаг рацарӕзт ӕмӕ фӕлгонцадыл…
Фӕстӕдӕр Битарты Вячеслав йӕ фӕндаг акодта Хетӕгкаты Къостайы номыл Астӕуккаг фӕлладуадзӕн паркмӕ. Уыцы объекты уавӕр фӕнывылдӕр кӕныны нысанимӕ дӕр республикӕйы Сӕргълӕууӕг бӕлвырд амынддзинӕдтӕ радта, парчы рацарӕзт кӕй бӕрны ис, уыцы подрядон организациты минӕвӕрттӕн.
Аразджытӕ куыд радзырдтой, афтӕмӕй парчы фӕзуӕттӕй ног плиткӕйӕ ныридӕгӕн ӕрӕмбӕрзтой 2 мин квадратон метрӕй фылдӕр. Уыимӕ, къахвӕндӕгтӕ ног дурӕй ӕрӕмбӕрзыны размӕ зӕххы бынты ауагътой электрон тыхдӕттӕн хӕтӕлтӕ ӕмӕ ӕндӕр хъӕугӕ коммуникацитӕ. Ног цырӕгътӕ сӕвӕрынӕй уӕлдай, парчы фӕзындзӕн ног бандӕттӕ дӕр. Аразджыты пъланы ис ӕндӕр куыстытӕ дӕр. Куыд нысангонд цӕуы, афтӕмӕй азы кӕронмӕ парчы цалцӕджы дыккаг къӕпхӕн дӕр хъуамӕ ахицӕн уа.
Кӕронбӕттӕны Битарты Вячеслав горӕты администрацийы разамындӕн бахӕс кодта, цӕмӕй иудадзыг лӕмбынӕг цӕстдард уа куыстыты хӕрзхъӕддзинадмӕ. Йӕ ныхасмӕ гӕсгӕ, уыцы куысты зӕрдыл дарын хъӕуы, парчы ӕмӕ Сабырдзинады проспекты бирӕ алыхуызон ӕхсӕнадон-дзыллон мадзӕлттӕ арӕзт кӕй ӕрцӕуы, уыцы ӕууӕл — хъуамӕ дзы ӕппӕт фадӕттӕ дӕр уа рӕстӕг зӕрдӕрухс ӕмӕ уӕнгрогӕй арвитынӕн.
Зӕгъын хъӕуы, Хетӕгкаты Къостайы номыл парчы рацарӕзт фыццаградон федералон проект «Ӕппӕтфадатджын горӕтаг алфамбылай»-ы фӕлгӕты кӕй цӕуы, уый дӕр.
