Цӕгат Ирыстоны Сӕргълӕууӕг Битарты Вячеславӕн кусӕг фембӕлд уыд акционерон ӕхсӕнад «МИнБанк»-ы Правленийы Сӕрдар Игор Антоновимӕ. Фембӕлды рӕстӕг ӕркастӕуыд республикӕ ӕмӕ банчы ӕмархайд ӕнгомдӕр кӕныны фарстытӕм.
Игор Антонов «МИнБанк»-ы сӕргъы ӕрлӕууыд августы ӕмӕ ныр Ирыстонмӕ ссыд, цӕмӕй базонгӕ уа банчы дзӕуджыхъӕуккаг филиалы (уый байгом 2002 азы) куыстимӕ.
Республикӕйы уазӕгӕн зӕрдиаг салам ратгӕйӕ, Битары-фырт куыд фӕнысан кодта, афтӕмӕй Цӕгат Ирыстон тырны Уӕрӕсейы егъаудӕр банктимӕ пайдайаг ӕмгуыстад парахатдӕр кӕнынмӕ. Уыцы финансон структурӕтӕй иу у «МИнБанк» — уыимӕ Ирыстонӕн хорз бастдзинӕдтӕ ис, банчы дӕлхайад республикӕйы цӕрджытӕн рагӕй кӕны финансон лӕггӕдтӕ. Республикӕйы разамонӕджы ныхасмӕ гӕсгӕ, бакусын хъӕуы, Цӕгат Ирыстоны дарддӕры социалон-экономикон рӕзтӕн ахъаз чи фӕуыдзӕн, ахӕм иумӕйаг проекттыл.
Игор Антонов йӕ дзуаппон ныхасы куыд фӕбӕрӕг кодта, афтӕмӕй банчы размӕ цы бирӕ нысантӕ лӕууы, уыдонӕй иу у бӕстӕйы хуссайраг регионты амалхъомады къабазы райрӕзтӕн уӕлӕмхасӕн фадӕттӕ аразын. Уыимӕ, банк йе ‘ргом здахы хицаудзинады регионалон оргӕнтимӕ ӕмархайд ӕнгомдӕр кӕныны хъуыддагмӕ дӕр.
— Нӕ банчы хуссайраг филиалтӕ уӕрӕх финансон лӕггӕдтӕ кӕнынц. Дызӕрдыг нӕ кӕнын, не ‘мгуыстад фӕахадгӕдӕр кӕнынӕн фадӕттӕ кӕй ис, ууыл. Мах цӕттӕ стӕм республикӕимӕ уӕрӕх ӕмгуыстадмӕ, куыд нӕ иумӕйаг проекттыл кусгӕйӕ, афтӕ сӕрмагонд паддзахадон программӕты уагӕвӕрдтӕ ӕххӕст кӕнгӕйӕ дӕр, — бафиппайдта Игор Антонов.
Фембӕлды архайдта «Мӕскуыйы Индустриалон банчы» дзӕуджыхъӕуккаг филиалы хицау Мӕрзойты Феликс дӕр.
РЦИ-Аланийы Сӕргълӕууӕджы ӕмӕ Хицауады пресс-службӕ
