Нӕ бӕстӕйы цы аивадон ахуыргӕнӕндӕттӕ ис, уыдоны ‘хсӕн зынгӕ бынат ахсы Кинемотографийы ӕппӕтуӕрӕсеон институт. Ростовы йын цы хайад ис, уым ныр къорд азы ӕнтыстджын рухстауӕн ӕмӕ сфӕлдыстадон куыст кӕны не ‘мзӕххон, курдиатджын режиссер, бирӕ зӕрдӕмӕдзӕугӕ документалон кинонывты автор Цӕлыккаты Вадим.
Вадимӕн ацы ран цы сфӕлдыстадон ӕрмадз ис, уым кусы суинаг режиссертимӕ. Ахуыр дзы кӕнынц ӕрыгон лӕппутӕ ӕмӕ чызджытӕ канд нӕ бӕстӕйӕ нӕ, фӕлӕ ма суанг фӕсарӕнтӕй дӕр.
— Мӕн фӕнды, цӕмӕй дзы Ирыстонӕй фылдӕр ахуырдзаутӕ уа, уый, — зӕгъы Вадим, — уымӕн ӕмӕ кӕддӕр амы кинонывтӕ исӕн студи хуыздӕрыл нымад уыдис Цӕгат Кавказы. Куыстой дзы бирӕ зындгонд режиссертӕ ӕмӕ оператортӕ. ӕмӕ уыцы профессионалты фӕлтӕр райсом чи раивдзӕн, ууыл хъуыды кӕнын хъӕуы абон. Хъыгагӕн, мӕ бон зӕгъын у (куыд исӕн къамисы уӕнг, афтӕ): а фӕстаг дыууӕ азы иу абитуриент дӕр нӕ федтон Ирыстонӕй нӕ Мӕскуыйы, нӕ Ростовы.
ВГИКы Ростоваг филиалӕн Ирыстонимӕ бастдзинӕдтӕ равзӕрыны охыл Вадим йӕ Райгуырӕн бӕстӕмӕ ӕрхуыдта йӕ ректор Александр Резвановы. Иумӕ бабӕрӕг кодтой Ирыстоны рӕсугъддӕр кӕмттӕ, уыдысты моладзандонты, музейты, базонгӕ йӕ кодта Цӕллагты мӕсыг ӕмӕ, ам цы этнографион музей арӕзт ӕрцыд, уыдонимӕ.
Кадджын уазӕгӕн Ирыстоны культурӕ, этнографи, фыдӕлтыккон цардуаджы, Уыналы хъӕуы истори ӕмӕ музейы тыххӕй цымыдисаг ӕмӕ зӕрдылдаринаг хабӕрттӕ радзырдта хъӕуы цӕрӕг, Цӕгат Ирыстоны сгуыхт нывгӕнӕг, этнографийы музей саразӕг, Цӕллагты Виктор. Уазджытӕ федтой ам, гом арвы бын цы кинотеатр арӕзт ӕрцыд, уый дӕр.
Александр Резванов разыйӕ баззад хӕххон хъӕу Уыналӕй, ӕрдзы рӕсугъддзинадӕй, йӕ фысымты хорз зӕрдӕйы ахастӕй. Уый загъта:
— Уыналы ис ӕппӕт фадӕттӕ дӕр нӕ филиалы ахуырдзаутӕн ам киноэтюдтӕ исынӕн, этнографион музейы гом арвы бын цы кинотеатр ис, уым та суинаг кинемотографисттӕ аразиккой сӕ куыстыты равдыстытӕ. Кинемотографийы тӕккӕ ногдӕр фӕрӕзтӕй ист аивадон ӕмӕ документалон кинонывтимӕ та ныридӕгӕн дӕр не студенттӕ фӕархайынц ӕппӕтуӕрӕсеон кинофестивалты ӕмӕ конкурсты. Зӕгъӕм, хӕрзӕрӕджы Цӕлыччы-фырты ахуырдзаутӕй иу архайдта конкурс «КрымДок»-ы Уӕрӕсейы зындгонд режиссерты ӕмрӕнхъ, ӕмӕ уым йӕ куыст хорзӕхгонд ӕрцыд. Уый канд Вадимы уӕлахиз нӕу, фӕлӕ нӕ ахуыргӕнӕндонӕн дӕр у, ӕнӕмӕнг, стыр ӕнтыстдзинад.
Ростоваг филиалы Ирыстоны фӕсивӕдӕй ахуыр кӕнын кӕй фӕнды, уыдонӕн та фадат ис драмон театры ӕмӕ кинойы актеры дӕсныйад райсынӕн, аивадон чи нӕу, ахӕм кинонывты режиссеры, анимацийы ӕмӕ компьютерон графикӕйыл дӕсныйӕдтыл сахуыр кӕнынӕн.
Иннӕ аз та нӕм байгом уыдзӕн, кинооператорты кӕм ахуыр кӕндзыстӕм, ахӕм ног факультет. Филиалы цур цы колледж ис, уым та цӕттӕ кӕнынц кинооператорты, аудиоцӕстуынгӕ техникӕимӕ кусӕг специалистты. Куыд нӕ филиалы, афтӕ колледжы рауагъдонтӕн сфӕлдыстадон куыст кӕныны бар ис нӕ бӕстӕйы театрты, кинойы ӕмӕ телеуынынады студиты. Нӕ филиалы студенттӕн сӕ дӕсныйадӕй арф ӕмӕ бирӕвӕрсыг зонындзинӕдтӕ дӕттынц Кинемотографийы ӕппӕтуӕрӕсеон институты фӕлтӕрдджын ахуыргӕнджытӕ.
Гасанты Валери
