0
106

Туризмы райрæзты фарстытæ

РЦИ-Аланийы Туризмы комитеты сæрдары хæдивæг Салхъазанты Светланæ журналисттимæ фембæлды рæстæг фылдæр æргом аздæхта, туризмы райрæзты социалон хызæгтæй куыд пайда кæнынц, уыцы фарстмæ.

— Цæгат Ирыстоны туризмы райрæзтæн ис тынг бирæ гæнæнтæ. Уазæгуаты нæм чи æрбацæуы, уыдон æнæбафиппайгæ нæ фæвæййынц, куыд рæсугъд у нæ æрдз, куыд хъæздыг сты нæ кæмттæ, уæдæ нæ æгъдæуттæ, нæ культурæ æмæ традицитæ, нæ цæрджыты уазæгуарзондзинад дæр сæ дисы бафтауынц.

— Нæ куыст цæмæй парахатдæр кæна, уый тыххæй бирæ мадзæлттæ бацæттæ кодтам, — зæгъы Светланæ. — Хæстæгдæр рæстæг Мæскуыйы цæудзæн Æппæтадæмон туристон æрвылазон равдыст. Цы бирæ регионтæ дзы архайдзæн, уыдоны ‘хсæн Цæгат Ирыстон ирдæй разындзæн. Нæ национ парк «Алани»-имæ базонгæ уыдзысты бирæтæ, ноджы ма хуызистытæ, видеороликтæ, нæ цардыуаг чи æвдисы, ахæм цæстуынгæ æрмæг æмæ национ сувениртæ фенæн уыдзæн нæ стенды. Ахæм егъау равдыстытæ фадат дæттынц раззагдæр туроператортимæ ног бастдзинæдтæ скæнынæн, республикæмæ инвестицитæ æрбаздахынæн.

Журналистты фарстытæн дзуаппытæ дæтгæйæ, Светланæ фехъусын кодта, комитеты сæрмагонд информацион сайт ногæй йæ хуыз кæй раивта. «Визит — Алания.ру» — комитеты ацы сайт хъæздыг у бирæ æмбарынгæнæн æмæ зонадон æрмæгæй. Уазæгуæттæ, хæрæндæттæ, нæ æрдзыхъæд, нæ æгъдæуттæ — æппæт хъæугæ бæрæггæнæнтæ алы хуызы фæлладуагъды тыххæй.

Дзæуджыхъæуы фыццаг автовагзалы, аэропорты, горæты уазæгуæттæй иуы дæр ис цымыдисаг информацион стендтæ.

— Æппæт Уæрæсейы туроператортæн æмæ блогертæн ацы аз сараздзыстæм, блок-тур кæй хонынц, ахæм культурон-зонадон балц нæ республикæйы рæсугъддæр бынæттæм. Æмгуыстад нын ис телеуынынады федералон каналтимæ, уым æвдисынц нæ Ирыстоны тыххæй видеороликтæ, хæстæгдæр рæстæг та туристон программæ дæр бацæттæ кæндзыстæм.

Сентябры бæрæг кæндзыстæм туризмы бон. Ныртæккæ куыст цæуы, квест, зæгъгæ, цымыдисаг хæслæвæрд æххæст кæныны нысанимæ баст чи у, ахæм балцы проектыл. Алкæй бон дæр дзы уыдзæн бацархайын, — загъта Светланæ æмæ фехъусын кодта, 11-14 мартъийы, регионы презентацийы нысанимæ, егъау туристон компанитæн кæй сараздзысты информацион балц.


Гугкаты Жаннæ

 

ОСТАВЬТЕ ОТВЕТ

Please enter your comment!
Please enter your name here