Боны фæткы — æнæниздзинады хъахъхъæнынад
Ацы боны уыдис Дзæуджыхъæуы муниципалон сконды Æхсæнадон советы радон æмбырд, æмæ дзы сæрдариуæг кодта Михаил Шаталов.
Æмбырды куысты архайдтой Дзæуджыхъæуы муниципалон сконды сæргълæууæг Икъаты Русланбег, йæ хæдивджытæ Александр Пациорин, Сæлбиты Зитæ, Бестауты Сослан, РЦИ-Аланийы æнæниздзинад хъахъхъæнынады министр Годжыцаты Тамерлан, «Росздравнадзор»-ы фæзуатон оргæны разамонæг Ольгæ Давыдова æмæ æндæр бæрнон адæймæгтæ.
Боны фæткы фыццаг фарст «COVID-19 пандемийы рæстæг горæты цæрджытæн медицинон лæггæдтæ кæныны тыххæй» раныхас кодта Æхсæнадон советы сæрдары хæдивæг Айларты Зæлинæ. Куыд бафиппайдта, афтæмæй республикæйы æмæ Дзæуджыхъæуы дæр æнтыстджынæй æххæстгонд цæуынц УФ-йы Президенты Указ «О предоставлении дополнительных страховых гарантий отдельным категориям медицинских работников» æмæ УФ-йы Хицауады Указ «О государственной социальной поддержке в 2020-2021 годах медицинских и иных работников, медицинских и иных организаций (их структурных подразделений)».
Докладгæнæг уымæй уæлдай радзырдта реабилитаци кæныны техникон фæрæзтæй æмæ протезтæ — ортопедион дзаумæттæй æфсисады фарстыты фæдыл, Дзæуджыхъæуы уæлбартæй пайдагæнæг граждæнтæн санаторон-курортон балцæгтæ дæттыны æмæ ацы горæты цæрджытæн медицинон лæггæдтæ Дзæуджыхъæуы дзæбæхгæнæн-профилактикон кусæндæтты кæныны фарстыты тыххæй дæр.
Медицинон кусджытæн фæдзæхстатон зæрдæдарæнтæ дæттыны, ковид-рынчынтимæ чи кусы, уыцы дохтыртæн мызд фидыны æмæ æнæниздзинад хъахъхъæнынады къабазы æгъдаухæлдтытæ бæрæг кæныны куысты, бæлвырддæр зæгъгæйæ, мæнг хостæ сусæгæй уæй кæныны æмæ хосгæнæн препараттæн маркæ дæттыны фæдыл ныхас кодта Ольгæ Давыдова.
Мидисджын уыдис Годжыцаты Тамерланы раныхас дæр. Уый дзырдта, ныртæккæ республикæйы эпидемиологон уавæр, цавæр у, уый тыххæй. Æнæзæгъгæ нæ фæцис, вакцинаци республикæйы алы рæтты куыд цæуы æмæ антибиотикотерапийы æвзæр фæстиуджыты тыххæй дæр.
Советы æмбырдмæ цæттæ кæныны рæстæг советы уæнгтæ Чеджемты Ноннæ, Тогуызты Зæлинæ, Задыты Ингæ, Куындыхаты Дзамболат бæрæг кодтой горæты дзæбæхгæнæн-профилактикон кусæндæтты, уыдон Уæрæсейы Президент æмæ Хицауады Указ æмæ уынаффæтæ куыд æххæстгонд цæуынц, уый тыххæй æмбырды фехъусын кодтой советы уæнгтæн.
Æмбырды иннæ ахсджиаг фарст уыдис цъæх фæлысты зайæгойтæ æхсæдыны куыст «Дзæуджыхъæуы фæлладуагъд æмæ культурæйы муниципалон центр «Радуга»-йы тæлмы»-йы. Ацы фарсты фæдыл раныхас кодта Æхсæнадон советы сæрдары фыццаг хæдивæг Æмбалты Барис. Уый советы уæнгтæн фехъусын кодта, экологи æмæ алфамбылай æрдз хъахъхъæныны къамис цы тематикон куыстытæ бакодта, уыдоны бæрæггæнæнты тыххæй. Уымæй уæлдай, æмбырды архайджытæ байхъуыстой ЦИПУ-йы профессор, биологон наукæты доктор Хетæгкаты Ацæмæзы раныхасмæ дæр, Дзæуджыхъæуы уынгты, фæзты æмæ æндæр æхсæнадон бынæтты бæлæстæ калд æмæ æхсæст куыд цæуынц, уый тыххæй.
Советы æмбырды ма ныхас цыд парчы тæлмы цъæх фæлысты, бæлæстæ калыны æмæ Сапицкаг будкæйы уавæры тыххæй. Цы алыхуызон хъуыдытæ загъдæуыд, уыдоны сæйрагдæр уыдис ахæм фæндон, цæмæй ацы куыст цæуа закъонадон бындурыл.
Бирæ ныхас рауад горæты гæдыбæлæсты тыххæй дæр. Æхсæнадон советы къамис куыд банымадта, афтæмæй уыдонæй асыгъдæг кæнын хъæуы горæты æхсæнадон бынæттæ, сæ кармæ та кæсын нæ хъæуы, горæтæгты цард æмæ сæ æнæниздзинадæн тæссаг кæй у, уый тыххæй.
Хъайтыхъты Тамарæ,
Дзæуджыхъæуы
Æхсæнадон советы нымæрдар
