Зындгонд куыд у, афтæмæй ивгъуыд фæлладуадзæн бонты сæ профессион бæрæгбон уыд Уæрæсейы цæрæнуатон-коммуналон хæдзарады кусджытæн.
Уыцы æууæл хынцгæйæ, къуырисæры Дзæуджыхъæуы бынæттон хиуынаффæйады администрацийы цы æмбырд сарæзтой, уым кад кодтой горæты цæрæнуатон-коммуналон хæдзарады хуыздæр кусджытæн. Фембæлды архайджытæн сæ профессион бæрæгбоны фæдыл арфæтæ ракодта æмæ хæрзиуджытæ радта Дзæуджыхъæуы администрацийы сæргълæууæг Фæрниаты Тамерлан.
«Сымах архайдæй бирæ аразгæ у нæ горæты адæмы æппæтфадатджын цард. Мæ зæрдæ уын зæгъы фидар æнæниздзинад, уæ зын, фæлæ хъæугæ куыст алкæддæр арфæйаг уæд», — загъта Фæрниайы-фырт.
Уыцы бон хæрзиуджытæ райстой компани «Владсток» æмæ иннæ муниципалон коммуналон кусæндæтты минæвæрттæ.
«Æхсызгон нын у, хуымæтæг кусæг лæджы архайдæн абон кад кæй скодтой, уый», — æмбырды фæстæ фæбæрæг кодта «Владсток»-ы слесыр Андрей Козлов.
Дзæуджыхъæуы администрацийы пресс-службæ
