Телеолимпиадæйы уæлахиздзау æмæ призер

0
89

Заводы поселочы 31-æм скъолайы 11-æм къласы ахуырдзау Къозаты Артуры чызг Аннæ фæуæлахиз æппæтуæрæсеон телевизион олимпиадæ «Умники и умницы»-йы. Аннæ у центр «Интеллект»-ы ахуырдзау дæр. Ерыстæм чызджы бацæттæ кодта уæлæмхасææн ахуырады педагог, историон наукæты кандидат Сосранты Зæлинæ.

— Телевизион равдысты архайынмæ райдайæны Аннæйы цæттæ кодта не скъолайы педагог. Ахуырдзау олимпиадæйы республикон хайы фæуæлахиз. Аннæ у æппæтвæрсыг уагæй курдиатджын чызг, фæндырæй цæгъды, кафджыты къорды архайы, къласы нымад у раздзогыл, ахуыры исы æрмæст «иттæг хорз» бæрæггæнæнтæ, сæрмагонд аттестат райсынмæ хъавы, — зæгъы ацы скъолайы директор Уарзиаты Зæлинæ.

Дзæуджыхъæуы 47-æм астæуккаг скъолайы 11-æм къласы ахуырдзау Козаты Уырызмæджы чызг Аннæ ссис телевизион олимпиадæ “Умники и умницы”-йы призер, æмæ истори æмæ æхсæнадзонынадæй Иумæйаг паддзахадон фæлварæнæй йын цы баллтæ уыд, уыдоныл ма йын бафтыдтой 200 баллы.

Рагацау æвзæрст темæйæн фарстытæ æмæ дзуаппытæ кæм ис, «Умники и умницы» у хистæркъласонтæн ахæм телевизион хъазты равдыст. Хъазты уæлахиздзауæн радтынц Мæскуыйы дунеон ахастдзинæдты паддзахадон институтмæ æнæ фæлварæнтæй ахуырмæ бацæуыны бар, хъазты кæронбæттæнмæ рацæуæг скъоладзаутæн та вæййынц ахуырмæ цæуыны фæдыл фæлварæнтæ дæттыны рæстæг льготæтæ.

Телеравдысты автор æмæ йе ‘нæивгæ амонæг у амынд институты журналистикæйы факультеты дунеон литературæйы кафедрæйы разамонæг, профессор, Уæрæсейы культурæйы сгуыхт кусæг, фыссæг Юрий Вяземский.


Нæ уацхæссæг

 

ОСТАВЬТЕ ОТВЕТ

Please enter your comment!
Please enter your name here