Коронавирусы тӕссаг низ цӕмӕй нӕ республикӕйы цӕрджытыл къаддӕр парахат кӕна, уый тыххӕй нӕ республикӕйы Хицауад ӕппӕт медицинон дзӕбӕхгӕнӕндӕтты кусджытимӕ иумӕ бирӕ хъӕугӕ мадзӕлттӕ аразынц. Цӕмӕй ацы низӕй къаддӕр адӕм рынчын кӕна, уый тыххӕй сын Дзӕуджыхъӕуы ӕмӕ республикӕйы поликлиникӕтӕ ӕмӕ рынчындӕтты фадат ис коронавирусы ныхмӕ правивкӕ скӕнынӕн.
Ацы азы райдайӕнӕй Цӕгат Ирыстоны медицинон колледжы дӕр кусы вакцинацигӕнӕн хайад. Ныр та дзы байгом, коронавирусӕй чи сдзӕбӕх, уыцы адӕмы ‘хсӕн мониторингы республикон центры хайад. Арӕзт та ӕрцыд РЦИ-Аланийы ӕнӕниздзинад хъахъхъӕнынады министрады хъӕппӕрисӕй.
— Нӕ республикӕйы районты дӕр байгом кодтам ацы центры нудӕс хайады. Кусынц дзы, медицинон ахуырад кӕмӕ ис, ахӕм бархионтӕ. Сӕ хӕс та у, коронавирусӕй чи фӕрынчын, стӕй дзы чи сдзӕбӕх, уыцы адӕмы ‘хсӕн ӕрфарст аразын. Куы сӕм бадзурынц, уӕд сын сӕ алчидӕр бӕлвырд радзуры, тагъд ӕххуысы машинӕ сӕ рынчындонмӕ цас рӕвдз фӕхӕццӕ кодта, уым сӕм дохтыртӕ ӕмӕ медицинон хотӕ куыд арӕхстджынӕй кастысты, уый тыххӕй. Уымӕй уӕлдай ма ӕрфарсты архайджытӕй райсӕм бӕлвырд информаци, уӕззау низ аиуварс кӕнынӕн сӕ цы хостӕ хъӕуы, уыдон Дзӕуджыхъӕуы ӕмӕ республикӕйы афтекты ссарӕн ис, ӕви нӕй, уый тыххӕй. Коронавирусӕй фӕрынчыны фӕстӕ сӕ реабилитаци цы уагыл арӕзт ӕрцӕуы, уый тыххӕй дӕр бархионтӕм вӕййы бӕлвырд бӕрӕггӕнӕнтӕ, — радзырдта нын медицинӕйы бархионты Уӕрӕсейаг змӕлды республикон хайады сӕрдар Сергей Зихов.
Нӕ республикӕйы коронавирусы низ цас тагъд парахат кӕны, рынчынты нымӕц цас тагъд рӕзы, уымӕ пандемийы райдайӕны дӕр сӕ цӕст дардтой ӕнӕниздзинад хъахъхъӕнынады министрады сӕрмагонд центры специалисттӕ. Фӕлӕ, коронавирусӕй чи фӕрынчын ӕмӕ дзы чи сдзӕбӕх, уыцы адӕмы уавӕр бӕрӕггӕнӕг центр та нӕ республикӕйы фыццаг хатт арӕзт ӕрцыд. Ӕмӕ кусдзӕн сентябры кӕронмӕ.
Гасанты Валери
