Йӕ курдиаты цӕхӕр — кӕстӕрты фарнӕн

0
79

Фӕндыр… Цӕй диссаджы удирдгӕнӕг тых ис дӕ зӕлты. Сӕ фӕрцы хъызт зымӕджы дӕр адӕймаджы зӕрдӕйыл хур фӕкӕсы. Фӕсурыс ын йӕ сагъӕс ӕмӕ рыст, йӕ уды ӕмӕ уӕнгты йын бауадзыс цӕрыны тых, йӕ цӕстӕнгасыл цардӕфсис цӕхӕр. Уӕдӕ ацы уадынгарз йӕ царды фидыц ӕмӕ фарны зӕдау амондхӕссӕг кӕмӕн ссис, нӕ аивады уыцы дӕснытӕй иу у цӕстуарзон ӕмӕ зӕрдӕхӕлар хистӕр, рухстауӕг ӕмӕ курдиатджын музыкант, фӕндырдзӕгъдӕг, Республикӕ Цӕгат Ирыстон-Аланийы культурӕйы сгуыхт кусӕг Туаты Светланӕ. Фӕндзай азӕй фылдӕр ацы фӕрнджын сылгоймаг удуӕлдай ӕмӕ бонзонгӕ лӕггад кӕны фӕндырдзагъды аивадӕн ӕмӕ кӕстӕры хъомыладӕн. Йӕ фӕрцы фӕндыр ӕмӕ зарӕг йӕ хъысмӕты фӕндаджы профессионалон дӕсныйадмӕ рухсхӕссӕг стъалыйау амондхӕссӕг кӕмӕн басгуыхтысты ӕмӕ сӕ фӕрцы Ирыстонӕн, нӕ бӕстӕйы театралон ӕмӕ музыкалон аивадӕн аккаг кӕстӕриуӕг чи кӕны, уыцы фӕлтӕртӕ бирӕ сты.

Цард ӕмӕ ӕгъдауы рӕстаг хъуыды цӕуыл ӕнцой кӕны, уыцы миниуджытӕ ӕфсарм, уӕздандзинад, ӕнкъараг зӕрдӕ, дардмӕуынаг зонд. Уыдоныл лӕууы Светланӕйы уд ӕмӕ курдиаты фарн. Ӕмӕ дзы ныр бирӕ азты зӕрдиаг амондхӕссӕг лӕггад кӕны нӕ дзыллӕйӕн, уӕлдайдӕр та фӕсивӕдӕн.

Светланӕ райгуырд 1941 азы декабры Къостайыхъӕуы. Кӕд йӕ сабидуг Фыдыбӕстӕйы Стыр хӕсты фӕстӕ фыдӕбойнаг азты  ӕрвыста, уӕддӕр йӕ хистӕрты рӕстаг зонды руаджы йе ‘нкъараг зӕрдӕйы ныфс нӕ асаст. Фӕлӕ тохы цӕхӕрӕй нал сыздӕхст йӕ фыд Владимир. Абон дӕр йӕ номимӕ баст сты йӕ зӕрдӕйы ӕнкъарддӕр мысинӕгтӕ. Знагимӕ тохы цы лӕгдзинад равдыста, уый та йын у сӕрыстырдзинады хос. Йӕ хистӕрты мысинӕгтӕм гӕсгӕ йе ‘нкъараг зӕрдӕйы цы сурӕт сныв кодта, уый фӕрцы дзы сӕрыстыр у кӕддӕриддӕр.

Светланӕйӕн йӕ уды арфы ирон музыкалон аивадмӕ цы уарзты цӕхӕр сыгъд, уый рӕсугъд уардийау райхӕлд, ӕмӕ ныры онг дидинӕг ӕфтауы. Нӕ дзыллӕйӕн бонзонгӕ лӕггад кӕнгӕйӕ, фыццаджыдӕр, йӕхицӕн хӕсыл нымадта рӕзгӕ фӕлтӕры сыгъдӕг удты аивады рухс бауадзын. Ӕмӕ фӕндзай азӕй фылдӕр кад ӕмӕ радимӕ цӕуы йӕ нысанмӕ. Зӕрдиаг архайды бӕркад та алкӕддӕр уӕлейӕ исгӕ, бынӕй ахадгӕ рауайы.

Светланӕ 1962 азы ӕнтыстджынӕй каст фӕци Дзӕуджыхъӕуы музыкалон училищӕйы дирижеры ӕмӕ зарӕггӕнджыты къорды разамонджыты хайад. Ам ын рӕдауӕй сӕ курдиаты цӕхӕр цы фӕлтӕрдджын ахуыргӕнджытӕ лӕвӕрдтой, уыдонимӕ уыд УФ-йы сгуыхт артисткӕ, зындгонд фӕндырдзӕгъдӕг Реуазты Симӕ. Уый фӕстӕ кусын райдыдта Дигорайы астазон скъолайы. Фӕсивӕды ахуыр кодта зарыны аивадыл. Йӕ зонындзинӕдтӕ сын алы хъомыладон фӕрӕзты руаджы парахатӕй лӕвӕрдта. Ахӕм хуызы узӕлыд бынӕттон интернаты ахуырдзаутыл дӕр. Йӕ аив ӕрбацыд, йӕ уӕздан ныхас, мидбылхудт ӕмӕ курдиатӕн ын аргъ кодтой ахуыргӕнджытӕ ӕмӕ скъоладзауты ныййарджытӕ. Уӕдмӕ, Светланӕйы ном, куыд курдиатджын фӕндырдзӕгъдӕг, афтӕ зындгонд уыд. Йӕ фыццаг сфӕлдыстадон ӕнтыстыл та нымайы, Мӕскуыйы 1960 азы Ирон аивад ӕмӕ литературӕйы декадӕйы кӕй архайдта, уый. Национ культурӕйы стыр цауӕн ма йе ‘мрӕнхъ ӕвдисӕн уыдысты ӕмӕ дзы сӕ курдиат равдыстой, ныридӕгӕн ирон аивады тырысахӕсджытӕ ӕмӕ курдиатджын музыканттӕ Кафты паддзахадон академион ансамбл «Алан»-ы раздӕры фӕндырдзӕгъдӕг Еналдыты Рая, УФ-йы культурӕйы сгуыхт кусӕг Хъесаты Еленӕ, РЦИ-Аланийы адӕмон артисткӕ Золойты Беллӕ, Кафты паддзахадон академион ансамбл “Алан”-ы раздӕры концертмейстер Бицъиты Земфирӕ, РЦИ-Аланийы культурӕйы сгуыхт кусджытӕ Цогойты-Хуырымты Аллӕ, Балаты Нинӕ, Туаты Светланӕ, Коккаты Хазби… Ахӕм стыр сфӕлдыстадон бӕрӕгбонмӕ та сӕ цӕттӕ кодта дӕсны фӕндырдзӕгъдӕг, Цӕгат Ирыстоны культурӕйы сгуыхт кусӕг Цъобпойты Валодя.

Царды уӕздан ӕмӕ йӕ куыстыл ӕнувыд чи уа, ахӕм адӕймагӕн йӕ хъысмӕты бардуаг лӕвар кӕны ӕнтыст, йӕ дӕсныйады та рӕзты уӕлтӕмӕн. Уый та Туайон банкъардта Дзӕуджыхъӕуы Ногдзауты галуаны фӕндырдзагъды аивады ахуыргӕнӕгӕй кусгӕйӕ. Ам 1970 азы йӕ хъомылгӕнинӕгтӕй-суинаг музыканттӕй сарӕзта ансамбл «Фӕндыр». Уӕдмӕ ахӕм арфӕйаг хъуыддаг царды рауадзынмӕ нӕ зындгонд музыканттӕй ничи сарӕхст. Аивадон къорды уыд 30 чызгӕй фылдӕр. Алкӕмӕн дӕр сӕ хи зондахаст, удыхъӕд, зӕрдӕйы хатт. Цӕмӕй нӕ Ирыстонӕн аккаг хъӕбултӕ суой, ууыл ӕмӕ сын фӕндыры алӕмӕты зӕлты ӕппӕт сусӕгдзинӕдтӕ раргом кӕнынӕн Светланӕ нӕдӕр йӕ уды хъарутӕ не ‘вгъау кодта, нӕдӕр рӕстӕгыл ауӕрста. Ног музыкалон уацмыс ахуыргӕнгӕйӕ, кӕнӕ фестивалтӕм цӕттӕгӕнгӕйӕ-иу йӕ ахуырдзауты ӕрмдзӕф ӕмӕ цагъд базоныны хъуыддаджы цы аиппытӕ ардта, уыдон-иу ӕнцонтӕй сраст кодта. Аивады сын хи фӕндаг ссарынӕн, цӕмӕй сӕ Ирыстонӕн аккаг хъӕбултӕ рауайа, ууыл Светланӕ хъуыды кодта ӕмӕ куыста кӕддӕриддӕр.

Бӕрзонд ӕмӕ аив мӕсыг дургай куыд фӕамайынц, афтӕ Светланӕ дӕр рӕзгӕ фӕлтӕры удварны ӕмӕ курдиаты рӕзтыл кусгӕйӕ кӕддӕриддӕр пайда кодта йӕ профессионалон арф зонындзинӕдтӕй, фыдӕлты хъомылады ахъаззагдӕр домӕнтӕй.

Ансамбл «Фӕндыр»-ы репертуары уыд адӕмон цӕгъдтытӕ, нӕ зындгонд музыкантты композицитӕ, стӕй, Светланӕ йӕхӕдӕг-иу кӕуыл бакуыста, ахӕм уацмыстӕ. Уӕдӕ нӕ республикӕйы цы аивадон инструменталон конкурстӕ уыд, уым-иу жюрийы уӕнгтӕ аккаг аргъ кодтой Ногдзауты галуаны инструменталон ансамблӕн. Йӕ архайджыты ӕрмдзӕф бонӕй — бон хуыздӕр ӕмӕ арӕхстджындӕр кӕй кӕны, уый-иу ӕхсызгонӕй бафиппайдтой ӕмӕ-иу сӕ схорзӕхджын кодтой уӕлахиздзауы дипломтӕй. Телеуынынад ӕмӕ радиойы редактортӕ ӕмӕ уацхӕсджытӕ дӕр Светланӕйы ӕмӕ йӕ ӕвзонг музыкантты тыххӕй иу ӕмӕ дыууӕ равдысты ӕмӕ радиобакасты нӕ сарӕзтой, республикон газеттӕ «Рӕстдзинад», «Социалистическая Осетия», «ӕрыгон коммунист»-ы дӕр рӕстӕгӕй-рӕстӕгмӕ бакӕсӕн уыд мидисджын уацтӕ.

Курдиатӕй ирд, ӕгъдауӕй ӕххӕст фӕсивӕд нӕ дзыллӕйы фидӕнӕн йӕ фарны фӕндаг нывӕндӕг кӕй сты, уый зонгӕйӕ, Светланӕ йӕ ансамбл «Фӕндыр»-ы алы архайӕгыл дӕр ныййарӕгау узӕлыд. Ирон фӕндыр ӕмӕ зарӕг та уыдысты йӕ хъомылады сӕйрагдӕр ӕххуысгӕнджытӕ, царды галиу митӕн ныхкъуырд дӕттынӕн та ӕххуысгӕнӕг «хотыхтӕ». Уыдоныл ӕцой кӕнгӕйӕ, йӕ рухстауӕн куысты цыд иу ӕнтыстӕй иннӕмӕ. Иры номдзыд поэт Хетӕгкаты Къостайы юбилейты кадӕн Дзӕуджыхъӕуы, йӕ райгуырӕн хъӕу Нары, Мӕскуыйы концертты зал «Уӕрӕсе»-йы, Колоннӕты зал ӕмӕ горӕт Жуковскы цы аивадон бӕрӕгбӕттӕ уыд, уым иудадзыгдӕр сӕ курдиат ӕвдыстой Ногдзауты галуаны ансамбл «Фӕндыр»-ы цӕхӕрцӕст фӕсивӕд.

Ансамбл «Фӕндыр»-ы архайджыты уӕлахизтӕ, стӕй сын кадджын ном «Адӕмон» кӕй радтой, уыцы хорзӕхтӕ дзурӕг сты Туаты Светланӕйы курдиаты цӕхӕрыл ӕмӕ дзы фынддӕс азы дӕргъы йӕ удуӕлдай рухстауӕн архайды биноныгдзинадыл, йӕ уӕрӕх ӕмӕ бӕлвырд сфӕлдыстадон цӕстӕнгасыл ӕмӕ кӕстӕртӕм ӕгӕрон уарзтыл.

Фидарӕй зӕгъӕн ис уый, ӕмӕ Туаты Светланӕ у, йӕ зӕрдӕйы ӕцӕг рухстауӕджы курдиаты цӕхӕр кӕмӕн фӕсудзы, йӕхи музыкалон ӕрмдзӕфӕй курдиатджын кӕстӕртӕн профессионалон аивады бӕрзӕдтӕм фӕндаг чи дӕтты, ахӕм фӕндырдзӕгъдӕг, сфӕлдыстадон кусӕг, ӕцӕг ирон уӕздан хистӕр. Уыцы ӕппӕт хорзӕхтӕй базырджын сты, фӕндырӕй цӕгъдыныл Дзӕуджыхъӕуы музыкалон салоны кӕй ахуыр кодта, уыцы фӕсивӕд. Уымӕн афтӕ буцӕй ӕмӕ сӕрыстырӕй ӕрхъуыды кӕны Светланӕ уыдонӕй сӕ алкӕй, фыццаг рацыд сценӕмӕ, сӕ музыкалон фӕлварӕнтӕ, сӕ рухс цӕсгӕмттӕ, сӕ бузныджы ныхӕстӕ. Ирыстоны ӕмӕ нӕ бӕстӕйы музыкалон ӕмӕ театралон аивады фарныл дзы йӕ удцырыны зынг чи ‘фтауы, уыдон сты УФ-йы сгуыхт артист, Стыр театры сӕйраг дирижер Сохиты Тугъан, Республикӕ Цӕгат Ирыстон-Аланийы адӕмон артисткӕ Гӕбуты Жаннӕ, нӕ республикӕйы культурӕйы сгуыхт кусджытӕ Пухаты Ларисӕ, Кафты паддзахадон академион ансамбл «Алан»-ы концертмейстер Датиты Эльзӕ, Цорӕты Жамелӕ, Хуыдиаты Альбинӕ, Хӕмыцаты Луизӕ, Дзгойты Мӕдинӕ, Мырзаганты Светланӕ, Оперӕ ӕмӕ балеты паддзахадон театры солист Габанты Марат ӕмӕ ма бирӕ ӕндӕртӕ.

Рӕстаг зондыл хӕст, курдиатӕй ӕххӕст музыкант ӕмӕ сфӕлдыстадон фӕлтӕрты хъомылгӕнӕг Туаты Светланӕйы арфӕйаг куысты фӕд бӕрӕг у Республикӕйы фӕсивӕды галуаны дӕр. Нӕуӕдзӕм азты йӕ хъӕппӕрисӕй ам сарӕзта инструменталон ансамбл «Фидӕн». Фӕндырдзагъды аивады сусӕгдзинӕдтӕ дзы бындуронӕй базыдтой бирӕ ӕрыгон лӕппутӕ ӕмӕ чызджытӕ. Сӕ курдиат ӕмӕ арӕхстдзинадӕн та сын аккаг аргъ скодтой Египеты горӕт Хургадайы арӕзт дунеон конкурс-фестивал «Калинка»-йы, Уӕрӕсейы хуссайраг хайы регионты инструменталон ансамблты ‘хсӕн арӕзт фестивал «Призвание» саразджытӕ ӕмӕ жюрийы уӕнгтӕ. Ацы аивадон ерысты ӕвзонг музыканттӕ райстой уӕлахиздзауты дипломтӕ. Афтӕ ма 2012 азы та се ‘рмдзӕфӕй ӕхсызгонӕй дисы бафтыдтой ӕппӕтуӕрӕсеон экологон форум «Планета Земля»-йы архайджыты. Уӕдӕ, Светланӕйӕн йӕхи ӕмӕ ансамбл «Фидӕн»-ы сфӕлдыстадон ӕнтыстытыл дзургӕйӕ, ӕнӕзӕгъгӕ нӕй, Уӕрӕсейы Центрон телеуынынады фыццаг каналы равдыст «Играй, гармонь любимая»-йы уазджытӕ кӕй уыдысты ӕмӕ ирон аивадимӕ мингай дзыллӕты кӕй базонгӕ кодтой, уый тыххӕй.

Цӕгат Кавказы регионты ӕмӕ нӕ республикӕйы иудадзыгдӕр цы бирӕ аивадон изӕртӕ ӕмӕ бӕрӕгбӕттӕ вӕййы, уыдоны дӕр иу ӕмӕ дыууӕ хатты нӕ архайдтой Светланӕйы ахуырдзаутӕ — фӕзминаг ансамбл «Фидӕн»-ы курдиатджын фӕсивӕд. Уӕдӕ, ацы галуаны цы аивадон къордтӕ ис, уыдонӕн сӕ фидыц кӕй сты, уый сӕ арӕхстдзинадӕй ирдӕй равдыстой йе ‘взонг музыканттӕ. Сӕрмагонд хуындмӕ гӕсгӕ ацы аивадон къорды архайджытӕ концерттӕ равдыстой Стъараполы, Кӕсӕг-Балхъары, Хъӕрӕсе-Черкесты республикӕты цӕрӕг ирӕттӕн, Египет ӕмӕ Турчы аивадон фестивалты.

Фӕндзай азӕй фылдӕр Светланӕ сыгъдӕгзӕрдӕ лӕггад кӕны аивадуарзджытӕн ӕмӕ кӕстӕр фӕлтӕрӕн. Йе сфӕлдыстадон архайды йӕм цы арф ӕмӕ бирӕвӕрсыг зонындзинӕдтӕ ис, уыдонӕй хайджын сты канд йӕ ахуыргӕнинӕгтӕ нӕ, фӕлӕ ма методикон ӕмӕ практикон ӕххуыс кӕны нӕ республикӕйы хъӕуты культурӕйы хӕдзӕртты ӕмӕ клубты инструменталон ансамблты разамонджытӕн ӕмӕ архайджытӕн.

Йӕ курдиатӕн ӕмӕ рухстауӕн архайды фӕлтӕрддзинадӕн аргъгӕнӕг сты Культурӕйы министрады ӕмӕ Адӕмон сфӕлдыстады республикон хӕдзары разамынд ӕмӕ методисттӕ. Сӕ хъӕппӕрисӕй цы фестивалтӕ ӕмӕ конкурстӕ арӕзт ӕрцӕуы, уырдӕм ӕй зӕрдиагӕй ӕрбахонынц. Ӕмӕ йӕ архайджытӕн, куыд жюрийы уӕнг, афтӕ Светланӕ бакӕны цӕстуарзон ӕмӕ, се сфӕлдыстадон рӕзтыл хорзӕй чи фӕзыны, ахӕм фиппаинӕгтӕ.

Ирыстоны аивадуарзджытӕн Светланӕ аккаг хӕрзты цӕуы йӕ фӕндырдзагъды уӕздан ӕмӕ фӕлмӕн, зӕрдӕагайгӕ ӕрмдзӕфӕй. Адӕмон цагъдтыты, кӕнӕ йӕхи ӕрхъуыдыгонд композициты дӕр зыны йе ‘нкъараг, рӕсугъд зӕрдӕйы уаг, ирон сылгоймаджы уӕздандзинад, хистӕры ӕмӕ кӕстӕры ‘хсӕн бастдзинад. Нӕ адӕмӕн табуйаг удварны хӕзнатӕ сты, Фыдыбӕстӕйы Стыр хӕсты чи бацарӕфтыд, уыцы ӕдзард хӕстонты, стӕй, йӕ артӕй чи раирвӕзт, уыцы фӕсивӕды фӕлгонцтӕ, хъӕуты цӕрджыты хъазуатон фӕллой ӕвдисӕг ӕнкъарӕнджын нывтӕ. Ахӕм ахастыты уаг ӕмӕ ӕнкъарӕнты бындурыл амад сты «Дзапароны цагъд», «Къостайыхъӕуккаг цагъд», «Нарон симд», «Чызджыты кафты цагъд», «Туаллаг хонгӕ»….

Светланӕйы аивадон —  сфӕлдыстадон хъуыдыгӕнынады хӕдхуыз дунейы хицӕн бынат ис зарӕгӕн. Йӕ мелодитыл куыд арӕхстджынӕй кусы, афтӕ йӕ вокалон композициты музыкӕ ӕмӕ ӕмдзӕвгӕты хъуыды арӕзт вӕййы иу бӕлвырд нысанмӕ —  зарӕджы мидисӕй аивадуарзджыты зонды, уды, зӕрдӕйы ӕнкъарӕнджын фӕлгонцтӕ сӕвзӕрын кӕнынмӕ. Уый та йын уӕлдай хорз цӕй фӕрцы ӕнтысы? Уый фӕрцы, сфӕлдыстадон бастдзинад цы поэттимӕ дардта, стӕй, ныр дӕр музыкӕ кӕй ӕмдзӕвгӕтыл фыссы, уыцы автортӕ Цӕгӕраты Гиго, Гӕлуаты-Боциты Зоя, Къадзаты Станислав, Гӕцойты Анетӕ, Дзасохты Музафер ӕмӕ Гаджиты Фатимӕ, фыдӕлты уӕздандзинады, намысы, ӕгъдауы миниуджытӕй ӕххӕст разындысты. Се сфӕлдыстадон удцырынӕй дӕр ацы хорзӕхтӕн лӕггад кӕнынц. Сӕ арф ӕнкъарӕнджын, ирон поэтикон, нуарджын зӕлгӕ дзырдтӕй нывӕзт ӕмдзӕвгӕтӕй Светланӕ цы зӕрдӕмӕдзӕугӕ уацмыстӕ ныффыста, уыдонӕй сӕ алкӕцыйы дӕр йӕ зӕрдӕйы цӕхӕр ӕвӕрд ис вокалон композицитӕ: «Зӕрдӕты бӕрӕгбон»-ы, «Сӕрдыгон хъазтизӕр»-ы, «Ног чындзы зарӕг»-ы, «Тӕргӕйтты», «Уарзты кувӕндон»-ы, «Куырдуатыбадӕг чызджы зарӕг»…

Светланӕйӕн йӕ аивадон ӕмӕ рухстауӕн архайд ӕнцой кӕны Хуыцауы арфӕ, куыстамонд, ӕмӕ, йӕхӕдӕг ӕмзагъд ӕмӕ ӕмзар ӕмбӕлттыл кӕй нымайы, уыцы зындгонд ӕмӕ ӕрыгон фӕндырдзӕгъджытыл ӕмӕ зарӕггӕнджытыл. Афтӕ куынӕ уаид, уӕд ын УФ-йы сгуыхт артисткӕ Медойты Светланӕимӕ, Цӕгат Ирыстон-Аланийы адӕмон артисткӕ Золойты Беллӕимӕ, Цӕгат Ирыстон-Аланийы сгуыхт артисткӕ Гуссауты Зӕлинӕимӕ, Цӕгат Ирыстоны сгуыхт артист Гобеты Сосланимӕ, йӕхи ахуыргӕнинӕгтӕй Гӕбуты Жаннӕимӕ, Пухаты Ларисӕимӕ, Дзгойты Мӕдинӕимӕ иумӕйаг инструменталон ӕмӕ вокалон композицитӕ саразын нӕ бантыстаид. Светланӕйы курдиаты фарн цы сфӕлдыстадон ӕнтыстытӕй бӕрӕг у, уыцы зӕрдиаг хуынтӕн сӕ иуыл дӕр йӕхи ничи атигъ кӕны. Се ‘ппӕт дӕр сты хӕрзарӕзт ӕмӕ аив, алы кары аивадуарзджыты зӕрдӕтӕм рухс ӕнкъарӕнтӕхӕссӕг композицитӕ. Иудадзыгдӕр фӕзӕлынц радио ӕмӕ телеуынынад «Алани»-йы, Национ телеканал «Осетия-Ирыстон»-ы эфирӕй. Ӕрӕджы та Светланӕ бацӕттӕ кодта йӕ фыст инструменталон ӕмӕ вокалон уацмысты диск «Мӕ царды бӕллиц». Бахаста йӕм 20 уацмысы.

Зындгонд фӕндырдзӕгъдӕг ӕмӕ сфӕлдыстадон фӕлтӕрты хъомылгӕнӕг Туаты Светланӕйы уды хорзӕх ахады ӕппӕтдунеон ӕхсӕнадон змӕлд «Иры Стыр Ныхас»-ы сылгоймӕгты советы арфӕйаг куыстыл. Йӕ царды фӕлтӕрддзинадӕй, кӕстӕрты хъомылады зӕрдиаг архайдӕй йӕм, нӕ дуджы домӕнтӕм гӕсгӕ, бирӕ хъуыдытӕ фӕзыны. Ӕмӕ сӕ раргом кӕны, дӕнцӕгтыл ӕнцойгӕнгӕйӕ, советы иумӕйаг ӕмбырдты, стӕй фӕсивӕдимӕ фембӕлдтыты.

Светланӕ йӕ цард ӕмӕ йӕ сфӕлдыстадон хъысмӕтӕй иттӕг разы у. Йӕ рухстауӕн архайдмӕ иу мисхалы бӕрц дӕр фау ӕрхӕссӕн нӕй. Цы аивадон къордтӕ сарӕзта, уыдоны фӕрцы аивады рӕсугъд фӕндагмӕ ракодта курдиатджын фӕндырдзӕгъдджыты дыууӕ фӕлтӕры. Йӕ амонды зӕд дӕр фӕхайджын кодта буц ныййарӕджы, хорз ӕфсины ӕмӕ рӕвдауӕг нанайы амондӕй. Йӕ сӕрыхицау, мидхъуыддӕгты оргӕнты ветеран, рухсыбадинаг Багаты Михалимӕ схъомыл кодтой, ӕмӕ абон сӕ фӕрнджын хистӕртау адӕмӕн сӕ фӕллойы ӕмӕ удварнӕй рӕсугъд ӕгъдаудӕттӕг сты сӕ кӕстӕртӕ Таймураз, Алан ӕмӕ Виктор.

Нӕ республикӕйы культурӕйы сгуыхт кусӕг, зындгонд фӕндырдзӕгъдӕг, рухстауӕг ӕмӕ ӕхсӕнадон архайӕг Туаты Светланӕ йӕ бындурон аивадон ӕрмдзӕфӕй ӕмӕ фӕсивӕдимӕ зӕрдиаг куыстӕй национ аивадмӕ ӕмӕ хъомыладмӕ ахадгӕ ӕвӕрӕн бахаста. Ӕмӕ йӕ ӕппӕтдунеон ӕхсӕнадон змӕлд «Иры Стыр Ныхас»-ы разамынд Хетӕгкаты Къостайы номыл паддзахадон премимӕ кӕй бавдыстой, уый нымайын раст уынаффӕйыл. Уымӕн ӕмӕ у ацы хорзӕхы аккаг!

Гасанты Валери

ОСТАВЬТЕ ОТВЕТ

Please enter your comment!
Please enter your name here